Испани улсад зохион байгуулсан Франциско Винасын нэрэмжит олон улсын дуурийн дуучдын уралдаан дүнгээ гаргалаа. Энэ уралдаанд улсаа төлөөлөн оролцсон МУГЖ, дуучин Э.Амартүвшин хоёрдугаар байрт орж, мөнгөн медаль хүртсэн байна. Мөн тэрээр уралдааны үеэр зохиогдсон “Орос ари дууг хэн сайн дуулах вэ” хэмээх тэмцээний тусгай байрын шагналыг авч ганзагаа мялаалаа. Уг тэмцээний тэргүүн байрт хоёр хүн шалгарсан нь Литвийн дуучин Катерина, Польшийн дуучин Мишель Жакуб нар байлаа. Харин Э.Амартүвшингийн ард буюу гуравдугаар байрт Молдавын дуучин Валерий шалгарсан аж. Олон улсын залуу дуурийн дуулаачдын дунд зарласан энэ тэмцээнд олон дуучин оролцсон бөгөөд хагас шигшээд орох эрхийг 40 нь авчээ. Сүүлийн шатанд 17 дуучин тунаж үлдэн өчигдөр шилдгүүдээ шалгарууллаа. Манай улсыг төлөөлж Э.Амартүвшингээс гадна МУГЖ Б.Солонго оролцсон юм.
