Хятадын Чалко компанитай байгуулсан гэрээгээ биелүүлж чадахгүйд хүрч, улмаар хууль шүүх дээрээ тулахад хүрээд байгаа Эрдэнэс Таван Толгойн уурхай хариуцсан дэд захирал Грэйм Хэнкок суудлаасаа огцрохоор болжээ. Түүний огцрох өргөдийг компанийн удирдах зөвлөл энэ долоо хоногт хүлээн авч, зөвшөөрсөн боловч хараахан олон нийтэд мэдээлэхээс татгалзаж байгаа гэнэ. Уг нь, Грэйм Хэнкок Таван толгойн хувьцааг Хонконг, Лондонгийн биржид гаргах бэлтгэл ажилд чухал үүрэгтэй нэгэн байсан ч тээвэрлэлтийнхээ зардлыг ч дийлэхээ больсон Эрдэнэс таван толгой IPO гаргахаа дахин хойшлуулсан болохыг хэд хоногийн өмнө зарлаад байгаа.  Компанийн шинэ захирал Я.Батсуурь  хувьцаа гаргах асуудал хамгийн наад зах нь 2014 он хүртэл хойшилсон, одоо нэн тэргүүнд Чалкотой нүүрс нийлүүлэх үнэ ханшаа тохирч авах нь чухал байна гэж мэдэгдсэн. Хятад руу нүүрс тээвэрлэсэн өмнөх зардлаа ч төлж чадаагүй тус компани Чалкод нийлүүлж буй нүүрсний үнээ нэмэгдүүлэх хүсэлтээ илэрхийлж, экспортоо зогсоочихоод байгаа ч Хятадын төрийн өмчит Чалко компанийн зүгээс гэрээг хоёр тал харилцан зөвшилцөж байгуулсан учир өөрчлөхгүй. Хэрэв Монголын тал гэрээгээ биелүүлж чадахгүй бол хуулийн арга хэмжээ авч, нөхөн төлбөр шаардах болно хэмээн  өчигдөр болсон хэвлэлийн хурлаар албан ёсоор мэдэгдсэн юм.
Ийнхүү Бээжинд Чалкогийн Монголыг хариуцсан худалдааны ерөнхийлөгч Ли Донггуан гэрээг өөрчлөхгүй гэдэг хатуу байр сууриа илэрхийлж байхад энд Хятадын Элчин сайд Ван Шао Лун “Эрдэнэс таван толгой-Чалкогийн гэрээ бол хоёр талдаа харилцан ашигтай гэрээ болсон. Эрдэнэс таван толгойн нөхцөл байдал одоо үнэхээр хүнд байгаа ч түүний бурууг Хятадын талд хүлээлгэх нь зохисгүй” гэдгийг хэвлэлийнхэнтэй уулзах үеэрээ мэдэгдэж, Эрдэнэс таван толгой Чалкогийн гомдлыг барагдуулах асар том өрөнд гарцаагүй уначихаад байгааг харууллаа.