Өнгөрсөн оны долдугаар сараас эхлэн жолооны үнэмлэх хэвлэх ажил гацаанд орсон. Бэлдэц тасарсан гэсэн шалтгаанаар өнгөрсөн оны 12 дугаар сарын 20 хүртэл жолооны үнэмлэх хэвлэгдэлгүй иргэдийг чирэгдүүлж, бухимдал үүсгээд байсан юм. Тэгвэл өнөөдөр жолооны үнэмлэх хэвлэх ажил жигдрээд явж байгаа аж. Одоогийн байдлаар 5000 жолооны үнэмлэхийг хэвлэж олгоод байгаа гэнэ. Тухайлбал, 2012 оны зургадугаар сарын 29-өөс аравдугаар сарын 31-ний хооронд жолоодох эрхийн үнэмлэхээ хаяж үрэгдүүлсэн гэсэн шалтгаанаар нөхөн авахаар материалаа бүрдүүлэн өгсөн жолоодох эрхийн үнэмлэхүүдийг бүрэн хэвлэж дуусчээ. Одоо ангилал ахиулах шалгалт өгч тэнцсэн 6000 орчим иргэн, шинээр жолооч болж байгаа 40 мянга орчим иргэний жолооны үнэмлэхийг хэвлэж байгаа аж. Хоёр сар орчим хугацаанд эдгээр иргэдийн жолоодох эрхийн үнэмлэхийг хэвлэж дуусах болно гэдгийг Замын цагдаагийн газрынхан хэлж байна.
