Залуусын хайрын үгсийг уянгалуулан дуулдаг “A Sound” хамтлаг гурав дахь удаагийн “Forever 247” тоглолтынхоо сюрпризыг дэлгэлээ. Тус хамтлагийнхан өнөөдөр 247 хүнд үнэгүй билет тараах ажлаа эхлүүлж байна. Жил бүрийн хайрын баярын өдрөөр “Үүрд 247” тоглолтоо хийж ирсэн бол энэ удаа “SS Club”-т тоглох бөгөөд тасалбар 20 мянган төгрөг юм.
Тус хамтлаг фэнүүдийнхээ дунд фэйсбүүк хуудсаа идэвхтэй хөтөлдөг хамтлагуудын нэг. Тийм ч учраас үнэнч сонсогч, дэмжигчидтэйгээ тоглолтоо хамтран зохион байгуулж буй гэхэд болно. Жишээлбэл, тоглолтын үеэр задлах гайхалтай сюрпризыг залуусын зөвлөснөөр хийжээ. Түүнчлэн зөвхөн хайртдаа зориулсан нууц бэлгийг хүлээн авч эхэлсэн гэнэ. Үүнээс гадна залуусаас ямар хайрын дууг тэр үдэш сонсмоор байна гэж асуусан нь фэнүүдийнхээ таашаалд нийцсэн тоглолт хийх гэсэн эрмэлзэл биз ээ. Дашрамд дуулгахад “A Sound” хамтлагийн “Зуун наст” цомог 2012 оны шилдэг цомог болсон байна.
