Мэс заслын дараахь У.Чавесын зургийг дэлгэлээ
2013 оны 2 сарын 16
Өнгөрсөн арванхоёрдугаар сарын 11-нд Кубын Гаванад мэс засал хийлгэхээр эх орноосоо мордсоноос хойш нэг ч удаа олны өмнө гараагүй Венесуэлийн Ерөнхийлөгч Уго Чавесын зургийг анх удаа олон нийтэд дэлгэн харууллаа. Түүний бие хорт хавдрын дөрөв дэх мэс заслынхаа дараа нэг хэсэг амьсгалын замын халдвар авч, хүнд байна гэж байсан ч сүүлийн үед дээрдэж, эмчилгээ сайн авч байгаа хэмээн Венесуэлийн эрх баригчид мэдэгдэж байгаа. Гэвч Ерөнхийлөгчийнхөө эрүүл мэндэд санаа зовнисон венесуэльчууд У.Чавесын тухай мэдээг сэтгэл түгшин хүлээж байсан юм. Харин пүрэв гаригт гэр бүлийнхэнтэйгээ авахуулсан Ерөнхийлөгчийн зургийг олон нийтэд дэлгэж, У.Чавесын биеийн байдал үнэхээр дээрдсэн гэдгийг харууллаа.

 Зурагт гарснаар У.Чавес Гавана дахь эмнэлэгт хоёр охинтойгоо инээлдэн юм ярьж, бас Кубын коммунист намын төв хэвлэл “Гранма”-г уншиж байгаагаар харуулжээ.  У.Чавесын бие харьцангуй дээрдсэн ч амьсгалын аппарат зүүж байгаа учир хүмүүстэй ярихад хүндрэлтэй байгаа гэдгийг албаныхан мэдэгдсэн байна. Тиймээс тэрээр бичгээр заавар тушаалаа гаргаж байгаа гэнэ.
У.Чавес сүүлийн 18 сарын дотор дөрвөн удаа мэс засалд орж, хэдэнтээ химийн эмчилгээ хийлгэж байгаа юм.
Б.Сэвжидмаа
 
Эх сурвалж: www.assa.mn
LIKE бэлэглээрэй. Танд баярлалаа.
Санал болгох
Зохиогчийн эрх хуулиар хамгаалагдсан. Мэдээлэл хуулбарлах хориотой.