БНАСАУ-ын нийслэлд ажилладаг олон улсын хүмүүнлэгийн байгууллагууд бямба гарагт шуурхай зөвлөлгөөн хийж, эх орондоо яаралтай буцна уу гэсэн БНАСАУ-ын Засгийн газрын анхааруулгыг хэлэлцжээ. Солонгосын хойгт нөхцөл байдал хурцадсан учраас өөрсдөө болон өөрийн улсын иргэдээ тус улсаас гаргана уу гэсэн сануулгыг тэд янз бүрээр хүлээн авч байна. Тухайлбал, НҮБ-ын Хөгжлийн хөтөлбөрийн газрынхан НҮБ-ын албан ёсны хариуг хүлээж байгаа гэнэ.
Үүнтэй зэрэгцээд үдээс өмнө удирдагч Ким Чен Ун оролцсон Умард Солонгосын удирдах байгууллагуудын нууц зөвлөлгөөн болжээ. Энд Дээд ерөнхий командлал, Засгийн газар, эрх баригч Хөдөлмөрийн намын төв хороо, Солонгосыг энхтайвнаар нэгтгэх улсын хорооны удирдлагууд оролцож Вашингтон, Сөүлд хандан мэдэгдэл гаргасан байна. Тэд урьдын л нэг адил АНУ, Өмнөд Солонгосын өдөөн хатгасан үйлдлийн хариуд “Хамгийн хатуу, цэргийн хариу арга хэмжээ” авна гэсэн байна. Өмнөд Солонгос, АНУ-ын хамтарсан цэргийн хээрийн сургуулийг умардынхан “БНАСАУ-ын төдийгүй Зүүн хойд Азийн аюулгүй байдалд заналхийлж байна” гэж үзсэн юм.
Энэ өдрүүдэд Умард Солонгос даяар бие даасан бодлого, өөрсдийн хүчээр хөгжих тухай их Чучхегийн онолыг үндэслэгч, Солонгосын анхны болон мөнхийн ерөнхийлөгч Ким Ир Сений төрсөн өдөр-үндэсний баяртаа бэлтгэж байгаа юм. Түүний төрсөн дөрөвдүгээр сарын 15-ны өдрийг угтаад баримтат болон уран сайхны кинод үзүүлж, үзэсгэлэн гаргажээ.