Холливудын хамгийн сайхан бүсгүй гэгддэг жүжигчин Анжелина Жоли хоёр хөхөө авахуулах мэс засалд оржээ.  Олон үетэй мэс засал, эмчилгээний сүүлчийн шат өнгөрсөн сарын сүүлчээр дууссан бөгөөд жүжигчин энэ тухайгаа өчигдөр “New York Times” сонинд бичсэн нийтлэлээрээ албан ёсоор зарласан байна.
Анжелина Жолигийн ээж Маршелин Бертранд 56 насандаа өндгөвчний хорт хавдраар нас барж байсан юм. Тэрээр эхээсээ хорт хавдар тусах эрсдлийн BRCA1 хэмээх генийг нь авч төрсөн байжээ. А.Жоли энэ оны эхээр хийлгэсэн шинжилгээгээр хөхний хорт хавдар тусах эрсдэл 87, өндгөвчний хорт хавдраар өвчлөх магадлал 50 хувьтай гэсэн хариу сонссоны дараа хоёр хөхөө авахуулахаар шийдсэн байна. Ингэж мэс засал хийлгэснээр түүний хорт хавдар тусах эрсдэл таван хувь хүртэл буурч байгаа аж.
Тэрээр мэс заслын өмнөх гурван сарын эмчилгээгээ хоёрдугаар сарын 2-нд эхэлж, тухайн сарынхаа 16-нд найман цаг үргэлжлэх томоохон хагалгаанд орж, хөхөө авахуулжээ. Харин өнгөрсөн сарын 20-нд тэрээр дахин мэс засалд орж, хиймэл хөх суулгуулсан байна. Гурван сар үргэлжилсэн энэ эмчилгээний туршид Анжелина Жоли урьдын адил олон нийтийн ажилд идэвхтэй оролцож, байнга олны нүдэнд өртөж байсан учир энэ гэнэтийн мэдээнд олон сая фэнүүд нь цочирдож байна.

Жүжигчин сонинд бичсэн нийтлэлдээ “Ийм шийдвэр гаргахад амаргүй гэдгийг бусад эмэгтэйчүүдэд хэлэхийн тулд энэ нийтлэлийг бичихээр шийдсэн. Би ийм шийдвэр гаргаж чадсандаа баяртай байна. Одоо миний хорт хавдар тусах эрсдэл таван хувь хүртэл буурсан. Одоо би хүүхдүүддээ ээжийгээ хорт хавдраар алдах нь гэж айх хэрэггүй болсон гэдгийг хэлж чадахаар боллоо” гэж бичжээ. Тэрээр мөн энэ бүх хугацаанд сүйт залуу Брэд Питт болон зургаан хүүхэд нь түүнийг үргэлж хайрлаж, сэтгэлийн дэм өгч байсанд маш их баярлаж байгаагаа илэрхийлжээ. Түүнийг “Pink Lotus” эмнэлэгт мэс засал, эмчилгээ хийлгэж байсан хором мөч бүрт Брэд Питт дэргэд нь байжээ. Тэрээр хоёр хөхөө авахуулсан ч энэ нь түүний эмэгтэйлэг байдлыг огтхон ч өөрчлөөгүй, дахин хөх суулгах мэс заслын үр дүн ч маш сайн болсон гэдгийг дурджээ.


Эцэст нь тэрээр “Миний туршлагаас бусад бүсгүйчүүд итгэл найдвар олж аваасай гэж хүссэн учраас үүнийг бичиж байна. Хорт хавдар гэдэг одоо хүртэл хүмүүсийг зүрхийг айдаст автуулж, түүний эсрэг зогсох ямар ч хүчгүй мэт гүн сэтгэгдэл төрүүлсээр байна. Гэвч өнөөдөр цусны шинжилгээгээр л хөхний юмуу өндгөвчний хорт хавдар тусах эрсдэлтэй эсэхээ мэдэж болдог, түүний эсрэг арга хэмжээ авч болдог болсон. Үүнийг уншиж буй бүсгүй хүн бүрт “Танд сонголт бий” гэж хэлэхийг би хүсч байна. Амьдралд олон сорилт бэрхшээл тулгардаг. Гэвч энэ сорилт бэрхшээл бидний айлгах ёсгүй. Бид түүний эсрэг зогсч чаддаг байх хэрэгтэй” хэмээн бичжээ.