Уул уурхайн салбар манай улсын эдийн засгийн гол тулгуур болоод буй билээ. Ингээд тус салбарын зарим статистик мэдээллийг сонирхож үзье. Энэ оны эхний дөрвөн сарын байдлаар улсын төсөвт уул уурхайн салбараас 12 тэрбум төгрөг оржээ. Энэ нь төлөвлөсөн орлогын 27.5 хувийг бүрдүүлээд буй аж. Уул уурхайн салбар өнгөрсөн онд ДНБ-ий 18.6 хувийг үйлдвэрлэсэн тооцоо бий. Үндэсний статистикийн хорооноос гаргасан мэдээллээр энэ оны эхний улирлын байдлаар аж үйлдвэрлэлийн 61.5 хувийг уул уурхайн үйлдвэрлэл эзэлж буй ажээ. Жишээлбэл 35 хувийн агуулгад шилжүүлсэн зэсийн баяжмал 82.4, хайлуур жоншны баяжмал 11.9, төмрийн хүдэр 501, цайрын баяжмал 30 мянган тонныг үйлдвэрлэсэн байна. Мөн 1.5 тонн гаруй алт, молибдены баяжмал 956 тоннд хүрчээ. Нүүрс манай улсын төсвийн гол орлого олдог салбар болсон. Өнөөдөр үнэ ханш нь унаж экспорт буураад байгаа. Гэвч энэ оны эхний дөрвөн сарын байдлаар 8.4 сая тонн гаруй нүүрс олборлов. Үүний 4.4 сая гаруй тонныг нь экспортолжээ.
