УИХ дахь МАН-ын бүлэг ээлжит хуралдаанаар хийж, УИХ-д хоёр хуулийг төсөл өргөн барих шийдвэрийг гаргажээ. Эхний хуулийн төсөл нь гурваас дээш хүүхэдтэй эхчүүдэд тэтгэлэг олгох тухай хуулийн төсөл байх юм байна.
Гэхдээ энэ хуулийн төсөл нь анх удаа санаачилж байгаа зүйл биш аж. Хоёр жилийн өмнө энэ хуулийн төслийг санаачилж, УИХ-аар хэлэлцэх эсэхийг нь шийдээд явж байхад нь Ардчилсан намынхан завсарлага авч, улс орны эдийн засаг хүрэлцэхгүй гэх шалтгаанаар хойшлуулж, гацааж байсан гэх. Гэтэл хоёр жилийн өмнө бидний санаачлаад явж байсан төслийг одоо АН-ынхан хэлэлцэнэ гээд явж байгаа нь зохимжгүй байна гэж УИХ-ын гишүүн С.Бямбацогт хэлсэн юм. Эл хуулийн зорилго нь хүн амаа өсгөхөд тусална гэсэн юм.
Бүлгийн хурлаас гарсан бас нэгэн шийдвэрийг УИХ-ын гишүүн Д.Сарангэрэл танилцуулсан юм. Энэ хуулийн төсөл нь их, дээд сургуулийг төлбөргүй болгох хуулийн төсөл аж. Энэ хуулийг баталж хэрэгжүүлснээр улсын төсөвт дарамт учрахгүй гэдгийг бүлгийн дарга Н.Энхболд тайлбарлаж байна. Учир нь, өмнө нь малчин болон төрийн албан хаагчийн  нэг хүүхдийг төр үнэ төлбөргүй сургаж байхад нийт оюутнуудын 80 орчим хувийг эзэлдэг байсан. Тиймээс оюутны сургалтын төлбөрийг бүр мөсөн хөнгөлөхөд улсын төсөвт дарамт учрахгүй. Тэр тусмаа одоогийн эдийн засгийн өсөлтөө хадгалаад явахад л боломжтой гэж тэд үзэж байгаагаа хэлсэн юм.

Оюутны их дээд сургуулийн төлбөрийг 100 хувь чөлөөлнө гэдэг бол эх орныхоо эздийн хувь заяаг баталгаажуулж байгаа бас нэгэн хэлбэр гэдгийг эрхэм гишүүн Д.Сарангэрэл онцолсон. Энэ жишиг АНУ-аас эхлээд хөгжингүй маш олон оронд байдаг тухай тэрээр онцолсон юм.
Гэхдээ эл хууль мөрдөгдөж эхэлснээр эх орны бүтээн байгуулалтад оролцох залуус байхгүй болж бүгд их дээд сургууль төгссөн, диплом өвөртөлсөн цагаан гартнууд болох юм биш биз. Хэдэн жилийн өмнө ихэнх залуус их дээд сургууль төгсөж ажил голоод байна гэж Мэргэжил сургалтын төвийг дэмжих бодлого хэрэгжүүлсэн. Үүнийгээ буцаад үгүй хийж байгаа юм биш биз гэсэн сэтгүүлчийн асуултад тэд хариулахдаа, “Одоогийн залуус яаж амьдрах вэ гэдгээ өөрсдөө сонгодог болж. Эцэг, эхээрээ ч хэлүүлдэггүй болсон байна. Тэгээд ч одоогийн залуус төрөөс өгч байгаа 70 мянгаа сургуулийн сургалтын төлбөртөө шууд хийчихдэг юм байна. Тэгэхээр тэр хүнд тодорхой хэмжээний мөнгө хэрэг болно. Энэ бүхнээ ажил хийж олохоос өөр гарцгүй” гэсэн тайлбарыг МАН-ын бүлгийн ахлагч Н.Энхболд өгсөн юм.
Мөн МАН-ын бүлгээс Ерөнхийлөгч Ц.Элбэгдорж ажлаа хийж байгаа нэртэй давхар сонгуулийн сурталчилгаа хийж байна. Энэ нь хууль зөрчиж байгаа эсэх асуудлаар холбогдох газарт хандана гэсэн юм.