Өнгөрсөн амралтын өдөр Иранд дөрвөн жилийн өмнөхөөс тэс өөр сонгууль боллоо. Ердөө дөрвөн жилийн өмнө Махмуд Ахмединежад ялсан сонгуулийн дараа сонгогчид эсэргүүцлээ илэрхийлэхээр Тегераны төв талбайг зорьж байсан бол энэ удаа харин баяраа тэмдэглэхээр тал бүрээс хуран цугларчээ. Тэд улсынхаа шинэ Ерөнхийлөгч Хассан Роуханиг урт наслаг хэмээн ерөөл хэлж, түүнийг л улс орондоо ардчилал шинэчлэлийг авчирч чадна хэмээн итгэж найдаж байна. 
Ираны 50 сая сонгогч 72,2 хувийн ирцтэйгээр сонгуульдаа оролцсоноос 50 гаруй хувийн дэмжлэгтэйгээр Хассан Роухани ялалт байгуулаад байна. Ираны дээд удирдагч Аяатолла аль Хаменей түүний ялалтыг баталгаажуулан үг хэлэхдээ “Хүн бүр шинэ Ерөнхийлөгчид, түүний Засгийн газрын гишүүд, хамтрагчдад нь туслах ёстой” гэдгийг сануулсан байна.
Сүүлийн найман жил Ираныг удирдсанаас сүүлчийн дөрвөн жилд нь олон нийтийн эсэргүүцэл тэмцэлтэй байнга тулгарч байсан Махмуд Ахмединежад Ерөнхийлөгчийн суудлаа ирэх наймдугаар сард хүлээлгэн өгнө. М.Ахмединежадыг олон түмний саналыг луйвардаж, Ерөнхийлөгч боллоо хэмээн орон даяар томоохон эсэргүүцлийн хөдөлгөөн өрнүүлж байсан иранчууд өнөөдөр баяр хөөртэйгөөр талбайдаа эргэн уулзаж байна. Х.Роуханигийн сонгуулийн сурталчилгааны бэлгэдэл өнгө болох ягаан өнгийн туг барьсан хүмүүс төв талбай руугаа тал бүрээс цувран ирж, замаар явсан машинууд дуут дохиогоо хангинуулан, баяраа тэмдэглэжээ. Тэдний зарим нь “Найман жилийн дараа бидэнд дахин итгэл найдвар төрлөө” гэж гадаадын хэвлэлд ярьжээ.
Иран гэхээр л М.Ахмединежадаар төсөөлөгддөг байсан улс орныг удахгүй хүлээн авах гэж буй Хассан Роуханигийн тухай товч танилцуулбал тэрээр лалын шашны санваартан хүн. Тэрээр лалын шашны ёс горимоо ягштал дагадаг ч шинэчлэл, өөрчлөлтийг ард түмэндээ авчирч чадна хэмээн итгэлтэйгээр мэдэгдэж байгаа юм. Хуулийн гурван ч зэрэгтэй, докторын ажлаа Шотландын их сургуульд хамгаалсан, Ираны стратегийн судалгааны төвийн ерөнхийлөгчийн хувиар байнга эссе нийтлэл бичдэг тэрээр англи, герман, франц, араб хэлээр чөлөөтэй ярьдаг, улсаа төлөөлөн өндөр албан тушаал хашиж, цөмийн хөтөлбөрийн зохицуулагчаар ажиллаж байв. 
Тэрээр ажилдаа ороод юуны өмнө цөмийн хөтөлбөрөөс болоод тус улсад тавиад байгаа олон улсын хоригийн нөхцөлийг зөөлрүүлэх талаар ажиллах юм байна. Сүүлийн жилүүдэд Иранд ажилгүйдэл хүрээгээ тэлж, мөнгө нь үнэгүйдэж, инфляц нэмэгдсэн гээд эдийн засгийн томоохон бэрхшээл амсч байгаа учраас эдийн засгийн хориг арга хэмжээг сулруулах хэрэгтэй байгаа юм.
Ерөнхийлөгчөөр сонгогдсон Х.Роуханитай хамтран ажиллахад таатай байх болно гэдгээ АНУ, Их Британи, Францаас эхлээд барууны томоохон орнууд зарлаад байна. Гэхдээ тэрээр олон улсын харилцаанд цаашид ямар байр суурь баримтлах вэ гэдгийг одоогоор хэлэхэд эрт. Ираны агаараас батлан хамгаалах хүчнийг удирдаж байхдаа гурван ч удаа дайнд оролцож, Ерөнхийлөгч Махмуд Ахмединежадын үндэсний аюулгүй байдлын зөвлөхөөр 13 жил ажилласан түүнээс өмнөх төрийн тэргүүнээс тэс өөр бодлого зарчим гарч ирнэ гэдэг эргэлзээтэй. Гэхдээ хэдий тэрээр өмнөх удирдагчидтай ойр дотно холбоо харилцаатай ч М.Ахмединежадын эсрэг Ногоон хөдөлгөөнийг дэмжиж, улс дахь хэвлэн нийтлэх эрх чөлөөний талаар зоригтой дуугардаг нэгэн юм. Ямартай ч, Ираны шинэ удирдагч олон улсын харилцаанд харцага шиг нэгэн байх уу аль эсвэл энхийн цагаан тагтаа байх уу гэдгийг харах л үлдлээ.
