1950-1953 оны Солонгосын дайнд ялсны 60 жилийн ойг тэмдэглэж байгаа тухайгаа “Японы булаан эзлэгчидтэй хийсэн цуст тэмцэл, АНУ-тай хийсэн дайнд ялж улс үндэстнээ чөлөөлөн дэлхийд хүчирхэг гүрэн байгуулсан ялагдашгүй, үхэшгүй мөнх Ким Ир Сений алдрыг тэмдэглэж байна” хэмээн Умард Солонгосын мэдээллийн ЦТАК агентлагийн мэдээлэлд дурджээ.

Их ялалтын 60 жилийн ойд зориулсан, жил бүр болдог Ариран наадам хөгжим, өнгө өнгийн цэцэг, галан чимэглэлд умбаж байна. 27-нд тэмдэглэх энэ ойгоор хөдөлмөрчдийн жагсаал, цэргийн парад болж ёслолын буудлага болно.

Энэ ойг тохиолдуулан БНАСАУ-ын Ардын дээд хурлын Тэргүүлэгчдийн зарлигаар  БНАСАУ-ыг үндэслэгч, мөнхийн ерөнхийлөгч Ким Ир Сенийг Эх орны чөлөөлөх дайны ялалтын 60 жилийн ойд зориулсан одонгоор шагнажээ.

Зарлигт Ким Ир Сен бол “Ялагдашгүй удирдагч, домогт баатар түүний удирдлагаар солонгосын ард түмэн ялалтад хүрч, эрх чөлөөгөө олон  тусгаар улсаа байгуулсан” гэж тэмдэглэсэн байна.
Энэ одонгоор мөн 2011 оны арваннэгдүгээр сард өөд болсон Ким Чен Ирийг шагнасан байна.

Улс орон даяар баярын арга хэмжээ хэдийнээ эхэлж томоохон кино театруудад эх оронч сэдвийн уран сайхны кино болон  “Эцэг удирдагч цэргүүдийн дунд”,  “Шалгарсан манлай удирдагч”, “Үндэстэн ба хувь зохиол”, “Их удирдагч минь таны тушаалыг бид хүлээж байна” зэрэг баримтат кинонууд гарч байна. Нийслэл болон том хотуудад их удирдагчийн туай, эх оронч сэдвийн гэрэл зургийн үзэсгэлэнгүүд үүдээ нээжээ.