УБЦТС ТӨХК-иас явуулж буй “Хэрэглэгчийн сар” аян хоёр дахь долоо хоногтоо үргэлжилж байна. Эхний долоо хоногт гэрээ шинэчлэн байгуулах ажлыг иргэдийн дунд идэвхжүүлэх, гэрээ байгуулахын ач холбогдлыг таниулах талаар мэдээлэл өгч байсан бол энэ удаа бид цахилгаан эрчим хүчний борлуулапт хэрхэн хийгддэг талаар болон гэрээний дагуу төлбөрөө өөрт хүндрэлгүйгээр хэрхэн хийх зэрэг асуудлын хүрээнд мэдээлэл хүргэхээр зэхлээ. Уншигч та бүхэн илүү дэлгэрэнгүй мэдээлэл авахыг хүсвэл манай Хэрэглэгчдэд үйлчлэх төвд зочлоорой.
-Борлуулалтын цикл гэж юу вэ?
-Тухайн циклийн хэрэглэгчдийн тоолуурын заалтыг уншуулах, хэрэглэгчийн сонгосон банк буюу тооцооны касст нэхэмжлэл хүргэгдэх, цахилгаан эрчим хүчнийхээ төлбөрийг төлөх, төлбөр төлөх тухай сануулах, цахилгаан эрчим хүчээр түдгэлзүүлэх тухай мэдэгдэл хүргэх, төлбөр төлөгдөөгүй тохиолдолд цахилгаан эрчим хүчээр түдгэлзүүлэх, шүүхэд шилжүүлэх мэдэгдэл хүргэх, шүүхэд шилжүүлэх зэрэг үйл ажиллагааг борлуулалтын цикл гэдэг. Улаанбаатар цахилгаан түгээх сүлжээ ТӨХК-ийн хувьд цахилгаан эрчим хүч хэрэглэгчдээ оршин сууж байгаа байршлаас нь хамааруулан борлуулалтын зургаан циклд хуваадаг. Тухайн аж ахуйн нэгж, айл өрхийг хэддүгээр циклд хамрагдаж байгааг “Цахилгаан эрчим хүчээр хангах гэрээ”-д хэрэглэгчийн кодын хамт тэмдэглэн өгдөг.
-Тоолуурын заалтыг яаж авдаг вэ?
-Цахилгаан эрчим хүчний борлуулалт, түүнтэй холбоотой үйлчилгээг тус компанийн дүүрэг бүрт байрлах Хэрэглэгчдэд үйлчлэх төвүүд явуулдаг. Тус төвийн тоолуурын заалт тэмдэглэгч нь тухайн аж ахуйн нэгж, айл өрхтэй байгуулсан “Цахилгаан эрчим хүчээр хангах гэрээ’’-ний дагуу сар бүрийн тогтсон өдрүүдэд тоолуурынх нь заалтыг авч борлуулалтын хэсэгтээ хүлээлгэн өгнө. Тухайн хэрэглэгчийнх электрон тоолууртай бол тоолуур унших гар удирдлагатай багажаар шууд уншуулна, харин механик буюу хар тоолууртай бол заалтыг багажид гараар шивж тэмдэглэдэг. Тэмдэглэсэн заалтуудыг холбогчоор компьютерт шилжүүлж, тусгай програмаар тооцоолон бодсоноор тухайн хэрэглэгчийн төлбөрийн нэхэмжлэх банк руу илгээгдэнэ.
-Цахилгааны төлбөрөө аль ч хэлбэрээр хийж болно?
-Цахилгааны төлбөрөө аль банкинд ямар хэлбэрээр төлөх нь таны дур бөгөөд гагцхүү “Цахилгаан эрчим хүчээр хангах гэрээ”-гээ шинэчлэн байгуулахдаа саналаа хэлчихэд л болно. Та хэрэглэгчдэд үйлчлэх төв, түүний салбар кассуудад эсвэл өөрийн сонгосон банкны аль ч салбарт очоод төлбөрөө төлж болохоос гадна, виза карт, мобайл банк, интернэт гээд арилжааны банк бүрт байдаг үйлчилгээг ашиглан төлбөрөө хугацаанд нь төлөх боломж нээлттэй байгаа шүү.
Хэрвээ та гэрээнд заасан хугацаандаа хэрэглэсэн цахилгааныхаа төлбөрийг төлөхгүй бол хугацаа хожимдуулсан хоног тутамд 0.3 хувийн алданги тооцогдож, таны цахилгааныг түдгэлзүүлэх ажил хийгддэг. Энэ тохиолдолд цахилгаан түдгэлзүүлээд эргэж сэргээлгэсэн ажлын төлбөр бас таны хэтэвчнээс гарахыг анхаараарай.
-Цахилгааны төлбөрийн үлдэгдлээ хэрхэн шалгах вэ?
-Та “Цахилгаан эрчим хүчээр хангах гэрээ”-гээ шинэчлэн байгуулахдаа гар утасны дугаараа бүртгүүлсэн бол төлбөрийн нэхэмжлэхээ сар бүр мэссэжээр авах боломжтой. Эсвэл мэссэж үйлчилгээний 137004 дугаарт хэрэглэгчийн кодоо бичиж илгээгээд төлбөрийн үлдэгдлээ мэдэж болно. Хэрэглэгчийн кодоо санахгүй байгаа тохиолдолд тус компанийн Дуудлагын төвийн 70047004 утсаар холбогдож хаяг, овог нэр, регистр, утасны дугаараа хэлээд үлдэгдлээ шалгаарай.
-Ямар хэрэглэгчдэд алданги тооцдог вэ?
-Монгол Улсын эрчим хүчний тухай хуулийн 31 дүгээр зүйлийн 31.2-д заасны дагуу хугацаандаа төлбөрөө төлөөгүй цахилгаан эрчим хүч хэрэглэгчдэд тухайн сарын бичилтийн дүнд алданги тооцдог. Алдангийг бичилтийн цикл дууссанаас хойш 21 дэх хоногоос эхэлж хоногийн 0,3 хувиар тооцох бөгөөд нэхэмжлэлийн дүн дээр нэмэгдэж гарна. Дараалан гурван сар төлөөгүй тохиолдолд Эрчим хүчний тухай хуулийн 32 дугаар зүйлийн 32.2.1-д заасны дагуу тухайн хэрэглэгч гэрээний зөрчлөө арилгах хүртэл түр түдгэлзүүлнэ.
-Цахилгаан эрчим хүчний үнэ тариф?
-Улаанбаатар цахилгаан түгээх сүлжээ ТӨХК нь үйлчлэх хүрээндээ Эрчим хүчний зохицуулах хорооны 2013 оны 68 дугаар тогтоолоор батлагдсан “Төвийн бүсийн үйлдвэр, аж ахуйн нэгж, байгууллагад болон айл өрхөд борлуулах цахилгааны тариф”-ыг энэ оны наймдугаар сарын 5-ны өдрөөс эхлэн мөрдлөг болгож байна.
Айл өрхийн хувьд энгийн тоолууртай хэрэглэгчийн сарын нийт хэрэглээний 150 кВт.ц хүртэлх хэрэглээг 79.00 төгрөгөөр, 151 кВт.ц болон түүнээс дээш хэрэглээг 96.60 мөнгөөр тооцно. Өдөр шөнийн тарифт электрон тоолууртай хэрэглэгчийн хувьд өдрийн хэрэглээ буюу 06.00-21.00 цаг хүргэл кВт.ц тутамд 84.00 төгрөг, шөнийн хэрэглээ буюу 21.00 цагаас 06.00 цаг хүртэл 60.00 төгрөгөөр тооцно. Харин тоолуургүй айл өрхийн сарын нийт хэрэглээг 350 кВт.ц-аар тооцох бөгөөд 150 кВт.ц хүртэлх хэрэглээг 79.00 төгрөгөөр, 151 кВт.ц болон түүнээс дээш хэрэглээг 96.60 мөнгөөр тооцно.
Үйлдвэр, аж ахуйн нэгж байгууллагын хувьд энгийн тоолууртай бол кВт.цтутамд 105.60 мөнгө, 3 тарифт тоолууртай бол өдрийн хэрэглээ буюу 06.00-17.00 цагт 105.60 мөнгө, оройн хэрэглээ буюу 17.00-24.00 цагт 178.60 мөнгө, шөнийн хэрэглээ буюу 24.00-06.00 цаг хүртэлх кВт.ц тутамд 60.00 төгрөгөөр тооцно.
-Цахилгааны суурь хураамжийг ямар үндэслэлээр авдаг вэ?
-Эрчим хүчний зохицуулах хорооны 2013 оны 68 дугаар тогтоолын дагуу цахилгаан хэрэглэгчдийн сарын суурь тарифыг 1000 төгрөг (НӨАТ-гүй)-өөр тооцож байна. Дэлхийн олон улс оронд мөрдөгддөг жишгийн дагуу цахилгаан эрчим хүчийг тасралтгүй үйлдвэрлэж, дамжуулан түгээж, хэрэглэгчдийг ямар ч үед /хоногийн 24 цагийн турш/ цахилгаан хэрэглэхэд бэлэн байлгахад шаардагддаг зардлыг үндэслэн суурь хураамжийг бий болгосон.
-Байр орон сууц худалдан авахад цахилгаан эрчим хүчний төлбөрийн үлдэгдлийг хэн хариуцах вэ?
-Энэ асуудлаар хэрэглэгчид ойлголт муутай явдгаас хохирол амсах тохиолдол багагүй гарч байна. Та хэрвээ шинээр үл хөдлөх хөрөнгө авах гэж байгаа бол хуучин эзэмшигч нь цахилгаан, дулаан, ОСК, СӨХ-д өр төлбөртэй эсэхийг нь заавал шалгаарай. “Цахилгаан эрчим хүч хэрэглэх дүрэм”-ийн 43 дугаарт, Байр, орон сууц, хашаа, газар өмчлөгч эзэм- шигч иргэн, ажахуйн нэгж, байгууллага нүүн шилжихдээ цахилгаан эрчим хүч хэрэглэсэн тооцоогоо хийж дуусган, энэ тухай тодорхойлолтыг хангагч байгууллагаас авсан байна. Энэ тодорхойлолтыг тухайн байр, орон сууц, хашаа, газрыг худалдан авч байгаа өмчлөгч эзэмшигч иргэн, аж ахуйн нэгж, байгууллага хуучин хэрэглэгчээс шаардаж авна. Хэрэв уг тодорхойлолтыг аваагүй тохиолдолд шинээр өмчлөгч нь эрчим хүчний өрийг хариуцна гэж заасан байдаг.