Бүх урлагийн хаан нь кино урлаг гэгддэг. Дүрс, дуу авиа, өнгө будгийн хослолоор өргөн хорвоогийн түмэн зүйлийг хүүрнэн өгүүлэгч эл гайхалтай урлаг манай оронд нэг хэсэг унтаа байдалтай байсан гэвэл санал нийлэх хүн цөөнгүй. Тэгвэл сүүлийн жилүүдэд нойрноосоо сэрж, сэргэж буй Монголын кино урлаг дэлхийн үзэгчдийн мэлмийг мялаах цаг ойртсоор. ССАЖЯ-ны санаачилгаар Монгол-Францын төв, нийслэлийн Соёл урлагийн газар хамтран “Улаанбаатар” олон улсын кино наадмыг ирэх сарын 4-9-ний хооронд Улаанбаатар хотноо зохион байгуулах гэж байна. Монголын кино урлагийн олон улсын хамтын ажиллагааг нэмэгдүүлэх зорилготой эл наадам нь “хаан” урлагийн түүхэнд шинэ хуудас дэлгэсэн онцлог үйл явдал юм. Засгийн газраас соёл урлагийн салбар тэр дундаа кино урлагийн хөгжлийн чиг хандлагыг тодорхойлж, бодлогын чанартай хөрөнгө оруулалт, шинэчлэлт хийж буйгийн нэг илрэл нь эл кино наадам. ОХУ-д жил бүр ерөнхийлөгчийн ивээл, санхүүжилтээр найман кино бүтээл хийгддэг нь улс орны батлан хамгаалах салбарын сүр хүч, түүх соёл цаашлаад Засгийн газрын бодлогыг сурталчилах чухал хэрэглүүр болдог аж.
Эл наадмын хүрээнд кино урлагийн хөгжлийн чиг хандлагыг тодорхойлж буй дэлхийн А зэрэглэлийн Канн, Берлин, Венецийн кино наадмуудын шилдэг 12 бүтээл Монголын үзэгчдэд үнэ төлбөргүй хүрэх аж. Цаашид жил бүр уламжлал болгон зохион байгуулах тус наадамд шалгарсан Монголын киночдын бүтээлийг Алтан бөмбөрцөг, Оскар, Каннын кино наадамд оролцуулж, монгол кино дэлхийн дэлгэцнээ шилдгүүдтэй өрсөлдөх цаг айсуй.
