Монголын зохиолчдын эвлэлийн Удирдах зөвлөлийн дарга асан Х.Чилаажав, гүйцэтгэх захирал Г.Мөнхцэцэг нарыг Авлигатай тэмцэх газарт шалгуулахаар өгчээ. ССАЖ-ын сайд Ц.Оюунгэрэл “Соёл, урлаг хөгжүүлэх сан”-гаас 82.6 сая төгрөг МЗЭ-ийн Их хуралд зарцуул хэмээн өнгөрсөн наймдугаар сарын 14-ний өдөр тушаал гаргажээ. Харин энэ мөнгийг хэрхэн, юунд зарцуулсан тайлангаа Зохиолчдын эвлэлийнхэн тавиагүй байгаа аж. МЗЭ-ийн Их хурлыг зохион байгуулахад төлөвлөсөн зарим ажилд мөнгө тусган зохион байгуулсан гэх ч бодит байдалд огт өөр байсан гэсэн мэдээлэл АТГ-т очсон гэнэ. Тухайлбал, энгэрийн тэмдэг хийлгэхэд 6.4 сая, гадаадын найман зочин урьж ирүүлэхэд 14 сая төгрөг хэмээн төлөвлөж ССАЖЯ-нд хандаж. Гэтэл хурлын үеэр энгэрийн тэмдэг өгөөгүй, гадаадаас хоёрхон зочин ирсэн байж. Иймээс хоёр өдөр үргэлжилсэн тус Их хуралд яагаад ийм их хэмжээний хөрөнгө мөнгө зарцуулсан талаар тайлбар авахын тулд Х.Чилаажав, Г.Мөнхцэцэг нарыг шалгуулахыг хүссэн аж.
Одоогоор тэд ямар нэг тайлбар өгөөгүй байгаа юм.