ГССҮТ-ийн зарим эмч ажилчин шинээр томилогдон очсон даргаа эсэргүүцэж халагдах өргөдлөө өгөөд байгаа. Одоогоор 184 ажилтан өөрийн хүсэлтээр өргөдлөө өгөөд байгаа юм. Харин дээрх ажилчдын хувьд Хөдөлмөрийн тухай хуулийн 39.1 дэх заалтын хүрээнд өргөдлөө өгснөөс хойш ажлын байраа орхих хугацаа энэ сарын 30-ны өдөр дуусгавар болно.
Үүнтэй холбогдуулан МҮЭХ болон Эрүүл мэндийн ажилтны үйлдвэрчний эвлэлийн холбоо мэдээлэл хийлээ. Мэдээллийн эхэнд Эрүүл мэндийн ажилтны үйлдвэрчний эвлэлийн холбооны тэргүүлэгч С.Туяа “ГССҮТ-өөс одоогоор гурван эмч халагдаад байна. Жишээ нь, тус эмнэлгийн зөвлөх, туршлагатай сайн эмч Шагдарсүрэнг хүртэл халсан. Ер нь цаашдаа энэ мэтээр өргөдөл өгсөн хүн бүрийн хүсэлтийг хүлээж аваад халаад байх уу. Нарийн, төрөлжсөн мэргэжлийн эмчийн ажлыг хүссэн нь хийгээд байдаггүй. Есдүгээр сард гурван талт уулзалт болсон ч олигтой үр дүн гараагүй. Сайдтай уулзсанаас хойш яамнаас хүмүүс эмнэлэгт очиж ажиллаагүй.
Одоо бүх эмч, ажилчид хүлээлтийн байдалтай байна. Дөрвөн эмчийг халж оронд нь шинэ эмч нар авч ажиллуулаад эхлэхэд “үнэхээр хэцүү юм байна. Больё” гээд өргөдлөө өгөөд гарсан нь байна.
Энэ хүмүүсийг халчих юм бол өвчтөнүүдэд үйлчлэх эмч боловсон хүчин байна гэж үү” гэдгийг хэлсэн юм. Түүнчлэн сайд гаргасан шийдвэрээ өөрчлөхгүй хэвээр байвал дээрх нэр бүхий 184 ажилтан ажлын байраа зэрэг орхин явна гэдгийг хэлсэн. ГССҮТ-ийн эмч ажилчид даргаа эсэргүүцэж, суулт зарлаж өргөдөл өгснөөс хойш бараг сар гаруйн хугацаа өнгөрөв. Гэсэн ч өнөөг хүртэл олигтой шийдвэр гарч асуудлыг цэгцэлсэнгүй” хэмээн ярилаа.
Харин энэ талаар яам ямар байр суурьтай байгааг Эрүүл мэндийн яамны Нийгмийн эрүүл мэндийн хүрээлэнгийн дарга Г.Нарангэрэлээс тодруулахад “ГССҮТ-ийн асуудлаар манайхаас байнга хариуцсан мэргэжилтнүүд нь очиж эмч ажилчидтай уулзаж байгаа. Ингэхдээ эмнэлгийн тусламж үйлчилгээ хэрхэн явж буйг хянадаг. Хамгийн сүүлд л гэхэд өнгөрсөн пүрэв гарагт өглөөний 08:00 цагаас шөнийн 02:00 цаг хүртэл тус эмнэлэгт ажилласан. Тэнд өвчтөнүүдэд эмнэлгийн тусламж үйлчилгээг хэвийн хүргэж байна гэж дүгнэсэн. Яам болон Энхбаяр даргын зүгээс эмч ажилчдаа халахгүй гэсэн байр суурьтай байгаа. Эмч нар Энхбаяр даргатай хамтарч ажиллаж чадахгүй, хуучин даргатайгаа ажиллах хүсэлтэй байна гэдгээ илэрхийлсэн. Эмнэлэг үйлчилгээний байгууллагын ажилтнуудын хувьд дарга нь хэн байх нь хамаагүй. Ямар ч даргатай байсан эмч нар өвчтөндөө эмнэлгийн тусламж үйлчилгээ үзүүлэх ёстой. Дэлхийн зарим оронд эмнэлгийг заавал эмчид даатга гэдэггүй өөр мэргэжлийн хүн ч удирдаад явдаг. Удирдлага бол эмнэлгийн санхүү, эдийн засгаа л зохицуулдаг. Харин тусламж үйлчилгээг нарийн төрөлжсөн мэргэжлийн эмч нар явуулдаг. Үүнээс гадна халагдсан эмч нар бусдыгаа болон өвчтөнүүдийг турхирч “би л таны хагалгааг хийж чадна. Надаас өөр хэн ч хийж чадахгүй. Та үүнийгээ хэл” гээд өвчтөнүүдээ хэвлэл мэдээллийн хэрэгслээр хүртэл яриулах болсон. Гэтэл одоогоор халагдаад байгаа гурван эмч гэхэд л улсын зардлаар сурсан. Ингэхдээ нэг эмч дунджаар 50-60 сая төгрөгөөр мэргэжил дээшлүүлсэн. Гэтэл энэ сурснаа эх орондоо үзүүлэх байтал би л ганцаараа чадна хэмээн боомилж байгаа нь даанч харамсалтай. Эмч, цэрэг хоёр яг адил тангараг өргөдөг. Цэрэг нь намайг удирдаж байгаа дарга надад таалагдахгүй байна. Би байлдахгүй гээд буугаа хаяад зугтдаггүй. Үүнтэй адилаар даргаасаа болоод өвчтөнүүдээ хаяад зугтаж байгаа эмч нар ёс суртахуунд нийцнэ гэж үү” хэмээн ярив.
Халагдсан эмч нарын оронд шинээр очсон эмч нар дотор эмнэлгийн талаар ямар ч ойлголтгүй Засгийн газрын “11:11” төвд ажиллаж байсан хүнийг ч томилсон талаар мэдээлэл гарах болсон. Эрүүл мэндийн яамнаас энэ тухай тодруулахад “11:11” төвд ажиллаж байсан Бат-Ирээдүйгийн тухайд эмч мэргэжилтэй яаманд Мэдээлэл шинжилгээ үнэлгээний газарт мэргэжилтэн хийж байсан төрийн албан хаагч. Төрийн албан хаагч Стратеги төлөвлөлт хариуцсан захирал гэдэг удирдах албан тушаалд очсон болохоос мэс заслын эмчээр очоогүй” гэдгийг хэлсэн. Түүнчлэн халагдах өргөдлөө өгсөн эмч нарыг судлаад үзэхэд эмчлэх, мэс засал хийх лиценз аваагүй эсвэл хугацаа нь дууссан ч эмчилгээ хийж байсан зөрчил илэрчээ. Ер нь Энхбаяр даргыг эсэргүүцэж байгаа нь тус эмнэлэгт нэлээд зөрчил дутагдал байгаагийн илэрхийлэл хэмээн яамныхан үзэж байгаа аж. Хэрэв цаашдаа дээрх 184 эмч, ажилчин даргаа эсэргүүцэж ажлаасаа гарахад хүрвэл Гамшиг буюу яаралтай үед авах арга хэмжээний төлөвлөгөөнд шилжих юм байна. Иймээс эмнэлгийн тусламж үйлчилгээг доголдохгүй гэдгийг албаныхан хэлсэн.
Иймээс ГССҮТ-д байдал ямар байгааг сурвалжлахаар бямба гарагийн орой 16 цагийн үед очлоо. Хүлээн авахын үүдэнд тав зургаан хүн дугаарлана. Дотор нь хоёр эмч үзлэг хийж байлаа. Эмнэлэгт үүсээд байгаа байдлын талаар тодруулах гэсэн боловч тухайн хоёр эмч мэдээлэл өгөх эрхгүй гэсэн юм. Харин холбогдох хүмүүс нь амарч байгаа гэлээ. Ингээд зарим өвчтөнтэй уулзаж эмнэлгийн тусламж үйлчилгээ хэрхэн хүрч байгааг сонирхлоо. Өөрийгөө Л.Сүхбат хэмээн танилцуулсан залуу “Би эмнэлэгт хэвтээд 21 хонож байна. Намайг эмчлэгч эмч ажлаасаа гарсан гээд хэд хоног үзлэг хийгээгүй. Өчигдрөөс шинэ эмчид үзүүлж байна. Эмнэлэгт хадаас олдохгүй байгаа талаар өвчтөнүүд хэлж байна билээ. Хуучин ажиллаж байсан эмч нар нь хадаас гаргахгүй байгаа гэсэн” гэв. Мөн тус эмнэлэгт хэвтэн эмчлүүлж буй нэгэн “эмчлэгч эмч нь байхгүй гээд хэд хоног эмчилгээ хийгээгүй” хэмээсэн. Энэ мэт эмч солигдох хооронд өвчтөнүүдэд эмчилгээ хийхгүй хэд хонож байгаа талаар дуулгав. Харин яам болон халагдах өргөдлөө өгсөн эмч нарын төлөөлөл эмчилгээ үйлчилгээ хэвийн байгаа хэмээн мэдээлж буй. Амь нас нь дээсэн дөрөөн дээр дэнжигнэх хүнд ганц хором ч чухал. Нүд үнэн чих худал гэдэг. Холбогдох албаныхан байдал ямар байгааг эмнэлэг дээр очиж ахиад нэг лавлаж харах биз ээ. Ц.Энхбаяр даргын хувьд ажлаа аваад долоо хонож байгаа. Халагдах өргөдлөө өгсөн эмч нартаа цаашид хамтран ажиллаж, хариуцсан ажлаа хийх талаар ярилцсан гэнэ.
Ингэхэд халагдахаар зэхэж байсан эмч нарын ихэнх нь өргөдлөө буцаан авах хүсэлтэй гэдгээ илэрхийлж баасан гарагийн үдээс хойш өргөдлөө татахаар болсон гэдгийг яамнаас дуулгав. Ямартай ч дээд, доод албан тушаалтны маргаанаас илүү эрдэнэт хүний амь нас чухал гэдгийг хэн хэн нь бодох биз ээ.
