“Алтан Дорнод Монгол” компанийн захирал С.В.Паушокийн өнөгрсөн долоо хоногт ETV-ийн сэтгүүлч С.Жимсээд онлайнаар өгсөн ярилцлага манай улс төрийн хүрээнийхнийг багагүй сандаргаад авав бололтой. УИХ-ын гишүүн Ц.Нямдорж өнөөдөр 12 цагаас хэвлэлийнхний цуглуулж “Монголын улс төрийн хамгийн том хүчний Их хурлын үеэр хутган үймүүлэх гэсэндээ С.В.Паушокийн ярилцлагыг гаргалаа. Тухайн үед гэнэтийн ашгийн 68 хувийн татварыг тойрсон залилан хийх, Монголбанкаар дамжуулан мөнгө угаах бйдал газар авсан байсныг би Хууль зүйн сайдаар томилогдож ажиллаж эхэлснээр таслан зогсоосон гэсээр үүх түүхээс яриагаа эхэлсэн юм. “Энэ маргаан С.Баярын Засгийн газраас эхлээд Сү.Батболдын Засгийн газрын үед дууссан учраас С.Баяр,Сү.Батболд, Ц.Мөнх-Оргил бид дөрвийг онцолсон байх. Намайг тэдний гар хөл болж тэр байтугай аллага зохион байгуулсан гэсэн байна. 70 гарсан зүрх муутай хүн машинаа барьж яваад нас барсны төлөө намайг буруутгасан. Энэ бүхнийг зориуд зохион байгуулсан хүн нь Эдийн засгийн хөгжлийн дэд сайд О.Чулуунбат байх магадлалтай.
О.Чулуунбат Монголбанкны ерөнхийлөгч байхдаа "Алтан Дорнод Монгол" компанийн 1.5 тонн алтыг хадгалж татвар төлөхөөс зайлсхийх боломж олгосон. Үүнээс нь болж С.В. Паушок Монголын Засгийн газраас 1.5 тэрбум ам.доллар нэхэмжилж, Арбитрийн шүүхэд хандсан. Харин би Хууль зүйн сайд байхдаа энэ асуудлыг хуулийн хүрээнд нь шийдвэрлүүлсэнд С.В.Паушок хорсч байгаа” хэмээн хэргийн эзэн хэнгэрэгийн дохиурыг тодруулав. Ямар ч байсан С.В.Паушокийн хувьд амаргүй нөхцөлд хөрөнгө оруулалт хийж ажил эрхлэх гэж зовж байснаа ярьж, Монголын төр засгийн зүгээс учруулдаг дарамтын талаар олон түмэнд дэлгэж орхисон нь ийн Хууль зүйн сайд асан Ц.Нямдоржийг яаралтай мэдэгдэл хийхэд хүргэв. Харин ярилцлагад нэр нь гарсан бусад гурван хүний хувьд ямар реакцаар хүлээж авсан нь удахгүй тодорхой болох биз.