Уг төхөөрөмж нь уншигч болон торгуулийн хуудас гаргагч гэсэн хоёр хэсгээс бүрдэх аж. Уншигч нь жолооны үнэмлэх, хурууны хээ болон иргэний үнэмлэх уншиж жолооч болон тээврийн хэрэгслийн тухай бүхий л  мэдээллийг цуглуулдаг аж. Ингэснээр замын цагдаа зөрчил гаргагч нь жолоодох эрх бүхий хүн байна уу, тээврийн хэрэгсэл оношлогоонд орсон уу, даатгалд хамарсан уу гэх мэтчилэн бүх төрлийн мэдээллийг авах боломжтой юм. Ингээд замын хөдөлгөөны дүрмийн дагуу торгуулийн хуудас гаргагч машинаар торгуулийн хуудсыг хэвлэн өгөх аж. Уг хуудас дээр автомашины улсын дугаар, жолоочийн мэдээлэл болон торгууль төлөх дансны дугаар байх юм.

Энэ төхөөрөмж нь замын цагдаад төдийгүй жолоочид ч олон давуу талтай юм. Өмнө нь жолооны үнэмлэхгүй замын хөдөлгөөнд оролцсон тохиолдолд автомашиныг журамлах, торгох гэх мэт олон асуудал үүсдэг байсан. Уг төхөөрөмжийн ачаар энэ асуудал ч мөн шийдэгдэж байгаа юм. Өөрөөр хэлбэл, жолооч гэртээ жолооны үнэмлэхээ мартсан тохиолдолд уншигч төхөөрөмжид хурууны хээ, цахим үнэмлэхээ уншуулж, замын цагдаад жолооны үнэмлэх гэдгээ нотлох боломж бүрдэх юм. Түүнчлэн жолоочийн сан, тээврийн хэрэгслийн сан, даатгал, оношлогооны сан гэх мэт замын хөдөлгөөнтэй холбоотой бүх санг нэгтгэх боломж бий болж байгааг ЗЦГ-ын удирдлагууд онцолж байлаа. Бэлэн бус төлбөр тооцоо гүйцэтгэхтэй холбоотой бүх мэдээллийг www.torguuli.mn цахим хуудсаар дамжуулан олон нийтэд нээлттэй байлгах аж.

Төхөөрөмжийг Ерөнхий сайд Н.Алтанхуяг болон ЦЕГ-ын дэд дарга, цагдаагийн хурандаа Ж.Ганбаатар,  Мэдээллийн технологи, шуудан, харилцаа холбооны газар(МТШХХГ)-ын дарга Ц.Жадамбаа нар уг төхөөрөмжийг замын цагдаа нарт гардууллаа. Ерөнхий сайд Н.Алтанхуяг, “Улаанбаатар хотод 400 орчим замын цагдаа байна. Замын цагдаа иргэдийг торгохдоо өвлийн хүйтэнд царцсан балаа амандаа хийн гэсгээж торгуулийн хуудас бичдэг цаг түүх боллоо. Замын цагдаа бүрт энэхүү ухаалаг төхөөрөмжийг өгнө. Иргэдэд чирэгдэлгүй үйлчилгээ үзүүлэх, замын цагдаа нарын ажлыг хөнгөвчлөх зорилгоор энэхүү төхөөрөмжийг өгч байгаа юм. Police reader нь 2 төрлийн багажтай. Нэг нь хурууны хээ, цахим үнэмлэх, жолооны үнэмлэхийг уншдаг бол дараагийнх торгуулийн хуудас бичиж хэвлэх юм. Жолооч 10  хоногийн дотор торгуулиа төлөх ёстой. Цаашид энэ мэтийн олон ухаалаг төхөөрөмжийг төрийн бүх үйлчилгээндээ нэвтрүүлэх болно” гэлээ.