Монгол Улс Азийн автозамын сүлжээ гурав зэрэглэлийн хатуу хучилттай автозамыг энэ жил ашиглалтад оруулж чадлаа. Орос Хятадыг холбосон хамгийн богино зам болох 990,7 км замын ажил дуусч, Дорноговийнхон хоёр хөрштэйгээ хатуу хучилттай авто замаар холбогдлоо. Мөн аймгийн төв Сайншандынхан Улаанбаатартай хатуу хучилттай замаар холбогдож, энэ замаасаа салаалаад аялал жуулчлалын буюу Хамарын хийд хүртэлх 42 км, үүнээс Ханбаянзүрх хайрхан хүртэлх 20 км хатуу хучилттай замыг тавилаа. Үнэндээ аймгийн төв рүүгээ л орох дөрвөн км хатуу хучилттай замтай байсан энэ аймагт сүүлийн дөрөв таван жилийн дотор 500 км автозамын ажил хийгдсэн юм. Хэдийгээр хоёр хөрштэйгээ гэж байгаа ч Ази Европыг холбосон ачаа тээврийн гол цэг нь Дорнийн говь болох боломж байна хэмээн тус аймгийн Засаг дарга П.Ганхуягийн хэлсэн үгийг энд онцолмоор. Тус аймгийн хувьд зам дагасан эдийн засгийн хөгжлийг бий болгоё гэсэн гол чиглэл барин ажиллах хамгийн боломжтой нь өнөөдөртөө. Энэ давуу талыг нь онцлон Засгийн газраас Дорноговийн төвийг Сайншанд аж үйлдвэрийн цогцолбор барих төвөөр сонгосон. Орон нутгийнхан ч энэ цогцолбороо түшиглэсэн 50-иад жижиг дунд үйлдвэрийг бий болгон хөгжүүлэхээр төсөв төлөвлөгөөгөө хийжээ.
Дэлхийн энергийн төв хэмээн бахархах дуртай дорноговьчуудын хувьд хөгжилд хөтлөх салбар нь мэдээж зам тээвэр нь. Зөвхөн Сайншандаас Хятад руу шууд гарах зам ашиглалтад орсноор хямд өртгөөр наад зах нь барилгын материалаа зөөх, цаг алдахгүй байх, мөн энэ замаар дамжин өнгөрөх ачаа тээврээс авах хураамж төлбөр гээд нутгийн иргэдийн амьдралд шууд болон шууд бусаар нөлөөлөх эдийн засгийн олон давуу талыг харж болох юм.
Эрдэнэттэй харьцуулшгүй их бүтээн байгуулалтаа тосон угтаж, эхний ажлуудад нь гар бие оролцон хийж эхэлжээ. Тийм учраас Засгийн газар болон Дорноговь аймгийн Засаг даргын тамгын газрынхан аймаг орон нутгаа хөгжүүлэх томоохон төлөвлөгөө дэвшүүлэн ажиллаж буй. 2015 он гэхэд бүх сумдаа цэвэр усны шугамд холбох төлөвлөгөөтэй байгаа тухай Засгийн газрын “Шинэчилж шийдье” уулзалтын үеэр аймгийн удирдлагууд онцгойлон дуулгасан. Өнгөрсөн дөрвөн жилд ам.метрийг нь 400 мянган төгрөгт багтаан 1300 шахам айлын орон сууц барьж ашиглалтад оруулж чадсан аймгийн удирдлагуудын үлгэр жишээ болохуйц туршлагыг ч бусад аймгууд судлах хэрэгтэй гэдгийг Засгийн газрын тэргүүн хэлж байсан. Газрыг үнэ төлбөргүй шийдэж өгсөн, орон нутгийнхаа барилгын компаниудыг дэмжин консерциум болон ажиллах нөхцөлөөр хангасан, сургууль, цэцэрлэг, эмнэлэг зэрэг нийгмийн үйлчилгээнүүдийг иргэдэд ойртуулсан гээд зөв бүтцийг бий болгож чаджээ хэмээн үнэлж байсан.
Харин аймгийн удирдлагууд ирэх жилүүдэд хийх ажлаа “Шинэ Дорноговь-2” хөтөлбөртөө багцлан эрчим хүчний шинэ эх үүсвэртэй болох, шинэ орон сууцны хорооллын шугам сүлжээ тавих, гэр хорооллыг дэд бүтэцжүүлэх “Жишиг гудамж” төсөл хэрэгжүүлэх, суурьшлын бүс бий болгох, иргэдийн амралтанд зориулсан цогцолбор хүрээлэн байгуулах, сумдыг дэд бүтэцжүүлж, төсвийн байгууллагуудаа төвлөрсөн халаалтын системд холбох гэх зэргээр төсвийг үр ашигтай зарцуулах боломжит ажлуудыг нэн тэргүүнд төлөвлөсөн гэнэ.
Ийн Дорноговийн хөгжлийн чиг тодорхой болсон учраас нийслэлийг чиглэсэн иргэдийн цуваа биш аймгаа чиглэх цуваанд зогсох хүмүүс олширсон гэдгийг орон нутгийн удирдлагууд бахархалтайгаар ярьж байсан билээ. Гэхдээ үүний цаана ажлын байрны шаардлага хангах чанартай боловсон хүчин юу билээ. Иргэдийн амьжиргааны төвшинг сайжруулахын тулд заавал боловсролд нь анхаарах цаг нь ирсэн гэдгийг нутгийн удирдлагууд юун түрүүнд тавьж аялал жуулчлалын чиглэлээр хэд хэдэн мэргэжилтнээ Япон Улсад сургасан аж. Төгсөөд ирсэн мэргэжилтнүүд нь “Дорноговь аймгийн аялал жуулчлалыг хэрхэн хөгжүүлэх вэ” гэсэн төлөвлөгөө гаргаад ажлаа эхэлсэн аж.
Зөвхөн мэргэжилтнүүд ч гэлтгүй ерөнхий боловсролын сургуулийн сурагчид ч Японы Шизүоки, БНХАУ-ын Ордос, Бугат хотод богино хэмжээниий сургалт , танилцах аялалд хамрагдсан байна.