2014 онд Чингэсийн нэрэмжит дэлхийн академи Зүүн гар, казахуудын тулааны тухай “Аугаа их талд болсон 10 том тулалдаан” гэдэг ном гаргах гэж байгаа тухайгаа тус академийн дэд ерөнхийлөгч Марал Тонпиев ярьж байна. “Бидний хэсэг судлаачид хагас жилийн хугацаанд 25 экспедиц гаргаж 25 мянган км зам туулан судалгаа хийж хэдэн мянган гэрэл зураг авсан. Энэ бол  дээрх түүхийн ном бичихэд хангалттай баримт болно” гэж тэр хэлжээ.
Тэр бас судалгааныхан Чингис хааныг хувь хүнийх нь хувьд сонирхолгүй орхиж болохгүй гэж байна. “Олон хүн түүнийг хэрцгий дарангуйлагч гэдэг. Нэг талаас тийм байж болох ч нөгөө талаас нь харах юм бол амар амгалан ертөнц бий болгохын тулд эхлээд нэгдсэн улсаа байгуулах, нэг захиргаанд оруулсан хуультай болох хэрэгтэй байсан шүү дээ. Энэ мэтээр бид олон зүйлийг олон талаас нь харж судалж байгаа юм. Ухаандаа дараа нь бид эдийн засгийн талаар Чингис хааны үлдээсэн өвүүдийг судална” гэж хэлжээ.
Генийн судалгааны төвийн захирал Гизат Табулдин бас Чингис хааны генийг хадгалсан удмынхан нь дэлхий даяар нийтдээ 16 сая хүн байгааг хэлж байна. Тэр Чингисийн угсааны хүмүүс Англи, Австрали, Франц, Армени, Орос, АНУ, бүр Тунист ч байна гэжээ.
“Би энэ улс орнуудын ажил мэргэжил нэгтнүүдтэйгээ холбоотой ажиллаж байгаа. Тэгэхэд тэр хүмүүс ДНК-гийн шинжилгээ хийлгээд Чингис хааны генийн залгамжлагч гэдгээ баталгаажуулж байгаа. Ген гэдэг бол нэг л бий болж удамших юм бол хэзээ ч өөрчлөгддөггүй, арилж устдаггүй зүйл. Чингис хаанд далайчид байсан, тэгэхээр түүний ген ямар ч улс үндэстэнд байгаа хэрэг” гэж тэр хэлжээ.
Эрдэмтдийн цуглуулсан баримтаар манай гаригийн улс орнуудад Чингисийн удмын 16 сая хүн байгаа гэдгийг тэр хэлсэн байна. Казахстанд гэхэд л 100 хүний нэг нь их Чингис хааны удмын хүн гэнэ.