ОХУ-ын Сочи хотноо болох өвлийн спортын XXII олимпийн наадамд гүйлтийн цанын сонгомол техникийн төрөлд оролцох эрхээ авсан ОУХМ Ч.Отгонцэцэг, Б.Бямбадорж нар дасгалжуулагч Д.Баттулга, багийн эмч О.Цэрэнжав нарын хамт “Скай резорт”-д бэлтгэлээ хийж байгаа юм.

Олон улсын цанын холбоо (FIS)-ноос манай улсад эрэгтэй, эмэгтэй тус бүр нэг цаначин олимпод оролцуулах квот олгосон. Энэхүү квотоор Монголын цанын холбооноос сонголтоо хийж 3725008 ID дугаартай Чинбатын Отгонцэцэг, 3720011 ID дугаартай Болдын Бямбадорж нарыг “Сочи 2014”-д оролцуулах болсноо Олон улсын олимпийн хороо, Олон улсын цанын холбоо /ОУЦХ/-нд албан ёсоор мэдэгдсэн юм. Манай хоёр тамирчин хоёулаа 1992 онд төрсөн, FIS /ОУЦХ/-гийн сонгон шалгаруулах тэмцээнд Б.Бямбадорж 174.56, Ч.Отгонцэцэг 235.90 онооны амжилт үзүүлээд байгаа юм. ОХУ-ын Сочи хотноо болох өвлийн спортын XXII наадам нээлтээ хийхэд 19-хөн хоног үлдээд байна.