“Хүүхдүүдийг авраарай” олон улсын хүмүүнлэгийн байгууллагаас “Дэлхийн ээжүүд”нэртэй төсөл хэрэгжүүлдэг. Энэхүү төслөөр дэлхийн өнцөг булан бүрт амьдарч байгаа ээжүүд тэдний эрүүл мэнд, амьдралын хэв маяг, хүүхдүүдээ өсгөх хүмүүжүүлэх талаар мэдээлэл бэлтгэн цаашид хэрхэн тэдэнд эрүүл мэнд, эдийн засгийн тусламж дэмжлэг үзүүлэх боломж байгааг судлан гаргадаг.

Норвеги бол хүүхэд төрүүлж хүмүүжүүлэхд хамгийн таатай нөхцөлтэй улсаар удаа дараа шалгарч байгаа билээ. Тус улс хүүхэд эмэгтэйчүүдийн эрхийг дээд зэргээр хангаж чаддаг гэдгээрээ ч дэлхийд нэгдүгээрт жагсдаг. 2010 онд 1000 хүнд 10,9 төрөлт ногдож байсан аж.

Эмэгтэйчүүдийн болоод хүүхдийн эрхийг хамгийн сайн хангадаг  10 улс нь европын орнууд байдаг. Харин энэ удаад эмэгтэйчүүдийн болоод хүүхдийн эрх хамгийн их зөрчигддөг улс орнуудыг нэрлэж байна.

1. Афганистан

1000 хүнд 38,11 төрөлт ногддог. Эмэгтэйчүүдийн дундаж наслалт 45. Афганистан нь эмэгтэйчүүд дунджаар 6,5 хүүхэд төрүүлдгээрээ дэлхийд дөрөвт жагсдаг. Харин хүүхдийн эндэгдлээр хамгийн өндөр орны нэг бөгөөд энэ муу статистикаараа дэлхийд тавд жагсдаг. Афган эмэгтэй бүр өөрийнхөө нэгээс хоёр, зарим нь гурван ч хүүхдээ оршуулсан байдаг аж. Байнгын дайн тулаан, иргэний үймээн самуунаас үүдэн хүн амынх нь дундаж өсөлт 2,6 хувь байдаг.

2. Нигери

1000 хүнд 36,07 хүн ногддог. Эмэгтэйчүүдийн дундаж наслалт 48, нэг эмэгтэй дунджаар 4,8 хүүхэдтэй байдаг.Хүн амынх нь жилийн өсөлт 2 хувь. ДОХ-ын халдвараар дэлхийд гуравт жагсдаг. Ихэнх эмэгтэйчүүд ямар ч эрүүл мэндийн тусламж авах боломжгүй нөхцөлд хүүхдээ төрүүлж өсгөж хүмүүжүүлдэг.

3. Гвинея-Биссау

1000 хүн тутамд 35,56 төрөлт ногддог. Тус улсын хүн амын 40 хувь нь залуучууд гэсэн статистик байдаг ч эмэгтэйчүүдийн дундаж наслалт 48. Тус улсын хувьд эмэгтэйчүүд дөнгөж уншиж бичих л боловсрол эзэмших боложмтой. Хуучны мухар сүсэг уламжлалынхаа дагуу тус улсад охидоо 13 нас хүрэнгүүт л нөхөрт гаргадаг бөгөөд олон эхнэртэй байхыг зөвшөөрдөг. Тус улсад нэг эмэгтэй дунджаар 4,6 хүүхэд төрүүлдэг ч жилд хүн амынх нь өсөлт 2 хувьтай байдаг.

4. Йемен

1000 хүнд 34,37 төрөлт ногддог. Бусад улсыг бодвол дундаж наслалт өндөртэй. Эмэгтэйчүүдийн дундаж наслалт 65. Гэвч эмэгтэйчүүдийн хувьд боловсрол олж авах тун хэцүү. Боловсролын төвшингөөр нь үзвэл эрчүүдийн 70 хувь дунд сургуульд сурдаг бол эмэгтэйчүүдийн 30 хувь нь бичиг үсэг тайлагдах төдийгөөр боловсролтой болдог. Тус улсын зарим тосгонд өнөөдрийг хүртэл 8 настай охиноо нөхөрт гаргах мухар үзэл байсаар байна. Эмэгтэй хүн бүр дунджаар 4,8 хүүхэд төрүүлдэг. Тус улсын хүн амын жилийн өсөлт 2,7 хувь.

5. Чад

1000 хүнд 40,12 төрөлт ногддог. Эмэгтэйчүүдийн дундаж наслалт 49. Эмэгтэй хүн бүр 5,2 хүүхэд төрүүлдэг төдийгүй эх хүүхдийн эндэгдэл нас баралтын 10 хувийг эзэлдэг. Мэдээж эмэгтэйчүүд ихэвчлэн ямар ч эрүүл мэндийн болоод эмнэлгийн тусламж авах нөхцөлгүй байдалд жирэмсэн болж хүүхэд төрүүлдэг. Хүн амынх нь жилийн өсөлт 2 хувь.

6. Бүгд найрамдах Конго улс

1000 хүнд 42,26 төрөлт ногддог. Бүгд найрамдах Конго улс нь эмэгтэйчүүдийн хүчирхийллээр дэлхийд хамгийн аймшигтай өндөр үзүүлэлттэй байдаг нь хүмүүнлэгийн болоод хүний эрхийн байгууллагуудын анхаарлыг зүй ёсоор татдаг. 1998-2004 оны хооронд албан ёсны тоогоор 40 мянган эмэгтэй хүчирхийллийн золиос болсон байна. Эмэгтэйчүүдийн хүчирхийллийн золиос болохтой зэрэгцэн хүүхдүүд хамгийн хүнд хэцүү нөхцөлд амьдрах болдог. Эмэгтэй хүний дундаж наслалт 57. Нэг эмэгтэй дунджаар 6,1 хүүхэд төрүүлдэг. Хүн амынх нь жилийн дундаж өсөлт 3,2 хувь.

7. Эритрея

1000 хүнд 33,48 төрөлт ногддог. Энэ улсын хувьд эмэгтэйчүүдийн хүчирхийллийн гэмт хэргээр мөн л толгой цохьдог африк тивийн улс. Энгийн иргэдээс гадна армид алба хааж байгаа бүсгүйчүүд ч хүчирхийлэлд өртдөг. Хүчирхийллийн улмаас жирэмсэн болсон хүсээгүй төрөлт зэрэг нь энэ улсын хувьд хамгийн тулгамдсан асуудал нь болоод буй аж. Эмэгтэйчүүдийн дундаж наслалт 64, нэг эмэгтэй дунджаар 4,6 хүүхэд төрүүлдэг. Хүн амын жилийн өсөлт 2,5 хувь.

8. Мали

1000 хүнд 51,08 төрөлт ногддогоороо дэлхийд 3-т байдаг. Тус улсын хувьд охидыг тамлан зовоодог хуучны мухар сүсэг нь өнөөдрийг хүртэл хэвээр байгаа бөгөөд охидын 85 хувь нь энэхүү зовлон зүдгүүрийг туулдаг.  Эмэгтэйчүүдийн дундаж наслалт 50.  Хүүхдийн эндэгдлээрээ дэлхийд дөрөвт жагсдаг бөгөөд нас баралтын 10 хувийг эзэлдэг.  Хүн амынх нь жилийн өсөлт 2,6 хувь байдаг.

9. Судан

1000 хүнд 36,58 төрөлт ногддог.  Суданы хувьд хүн амынх нь 42 хувь нь ундны усны эрс дутагдалтай нөхцөлд аж төрж байна.  Эмэгтэйчүүдийн 50 хувь нь бичиж сурсан байдаг. Дундаж наслалт нь 53,5. Эмэгтэй хүн бүр дунджаар 4,5 хүүхэд төрүүлдэг. Эхийн эндэгдлээрээ дэлхийд хамгийн өндөр үзүүлэлттэй. Хүн амын өсөлт нь 2,1 хувь.

10. Төв Африйкийн бүгд найрамдах улс

1000 хүнд 36,79 төрөлт ногддог. Эмэгтэйчүүдийн дундаж наслалт 51. Бага ангийн боловсрол эзэмшдэг. 2002-2003 оны хооронд болсон иргэний дайны улмаас эмэгтэйчүүд нь хүчирхийлэлд маш ихээр өртсөн. Эмэгтэй хүн бүр дунджаар 4,7 хүүхэд төрүүлдэг. Эхийн болоод хүүхдийн эндэгдэл нас баралтын 10 хувийг эзэлдэг. Жилийн хүн амын өсөлт нь 2,1 хувь.