Хавар болсныг мэдэх цаг хугацаанаас өөр шалгуур үзүүлэлтүүд байдаг. Урь орж, цас хайлахаас гадна шинэ төлийн дуу малчны хотонд цангинаж буйг тойрогтоо ажилласан УИХ-ын гишүүн мэдээлж эхлэх нь хаврын дохио. Түүнчлэн улс төрийн синдром эхэлснийг үзвэл үнэхээр хавар болжээ гэж ойлгож болно.
МАХН-ын гишүүний “ургац хураалт” энэхүү синдромын эхлэлийг тавьж, чуулганы завсарлагаанаар тохиох улс төрийн аниргүйг эвдэв. Онц их хурлаа сар гаруйн дараа хийхээр товлосон тэдний бэлдсэн улс төрийн олон ангит хошин шоу тоглолтыг тоохгүй өнгөрч боломгүй.
Тус нам шинэчлэгдэн зохион байгуулагдахдаа л “Шинэ төрийг урлан бүтээгч” гэж өөрсдийгөө онцолж ирсэн нь тэднийг уран бүтээлч, урлаач гэдгийг илтгэх биз ээ. Тэд намын гишүүдээ юуны тулд зуу зуугаар бөөндөн элсүүлж байгаа бол.
Зарим хүний хэлэх нь нам дагавал ам тосдоно гэгчийг үзүүлж өөдөлж яваа намд өөрийн хүчээ өргөхөөр эртнээс зэхэж буй гэх. Хавсарга тавьсан тарчиг цагт хонь мал хүртэл өвсний гарц хайж, аль сайхан газар бэлчиж байхад улс төрийн карьер эрэлхийлсэн хүмүүс намаасаа урваж нөгөөд орох нь байхаас аргагүй ч юм шиг. Тэд МАН-аас 200 гишүүнийг хэдийнэ урвуулаад авснаа мэдээлсэн бол одоо АН-аас 400 гишүүн “тонших” тухай шуум тарлаа. Тэдний ард дахиад 700 хүн ээлжээ хүлээж, их-элсэлт хийхээр төлөвлөсөн гэж удирдлагууд нь нэгэнтээ ам алдаж байсан. Ер нь, шинэ МАХН хэзээнээсээ зуу зуугаар нь гишүүн элсүүлэх сонирхолтой. Байгуулагдсан даруйдаа эгэл гишүүн бус УИХ-ын гишүүдийг урвуулж, элсүүлж байсан. Харин түүний хойтон хоёр ч зуутыг өөртөө нэгтгэсэн түүхтэй. Өргөжиж буй энэ үйлдлээрээ МАХН анхнаасаа эсэргүүцэн байсан МАН хийгээд АН-аас хариугаа авч, мананг сарниулах зорилгоо мянган хүнээр ч атугай ахиулж байгаа аж.
Энэ олон гишүүн МАХН хэмээх байгууллагын өмнө дараахь үүрэг хүлээж буй. Намын ажилд идэвхтэй оролцох, мөрийн хөтөлбөрийг сурталчлан хэрэгжүүлэх, дүрмийг сахин биелүүлэх, намаас нэр дэвшигчийг дэмжин сурталчлах, хүрээгээ тэлж гишүүн элсүүлэхэд туслах ёстой. Яг л “Орифлэйм”-ийн сүлжээ шиг. Мөн татвар хураамжаа тогтмол төлөх, хандив өргөх, намын хэвлэл захиалах, сан хөмрөг арвижуулахад идэвхтэй оролцох үүрэгтэй. 2011 оны зургадугаар сарын байдлаар тус намын гишүүнчлэлийг 35 мянга гэж тооцсон баримт бий. Орчин цагт “Орифлейм”-д элсэхээс илүү намын гишүүн болох нь өгөөжтэй сонголт болсны илрэл биз ээ. Уг нь, ажил хийвэл ам тосдоно, “Орифлэйм”-д элсвэл нүүрээ тослоно гэж энгийн логик буумаар. Гэвч намд л орвол ам байтугай бүгдийг тосолж болно гэж олон хүн итгэдэг бололтой. Монголчууд МАХН-д элссэн нь гэдэг энэ “уран бүтээлийн” үед солонгос кино шиг ээдрээтэй хэд хэдэн үзэгдэл гардаг.
Хаврын элсэлтийн үед улс төр дундаа будилж, төөрсөн хүн ч бий. “Хүнтэй уулзах гээд очсон чинь намын батлах өгчихсөн, бүү мэд” хэмээн спортын гавьяат тамирчин С.Батцэцэг хээв нэг ярьжээ. Гэтэл үүнийг эсэргүүцсэн МАХН-ын гишүүд “Цаанаас нь Д.Дагвадорж дарамталсан. Ах Д.Сумъяабазар нь МАН-ын хүн учраас нөлөөлсөн. Тэр ч бүү хэл Д.Дагвадорж Шадар сайд Д.Тэрбишдагвыг дарамталсан” гэв. Үнэнийг асуухаар гавьяат тамирчин бөөрөнхийлөөд, Д.Дагвадорж үгүйсгээд байх. Харин Д.Тэрбишдагва сайд эзгүй байгаа тул эргэж ирээд ээлжит тайллыг хийх бололтой. Яг энэ үзэгдлийн хамгийн сонирхолтой зангилаа нь С.Батцэцэг өөрөө өргөдөл бичсэн, анкет бөглөсөн үү эсвэл гипнозын аргаар өөр хүн бичүүлсэн үү гэдэг асуудал. Энэ тайллыг хүлээж улс төрчдөд солонгос кино ч сонин байхаа больжээ. Гэвч МАХН-ын хувьд мянган хүн элсэж байхад нэг хүн буцахад хотойхгүй биз ээ.
Олон ангит цувралын дараагийн ангид хутган үймүүлэгчдийг таван дэлбээгээр илрүүлэх арга тодорхой болов. “МАХН-ын гишүүд дэмжигчдийн холбоо” гэх байгууллагынхан үнэндээ МАН, МАХН-ын эрлийз гэнэ. Аль алиных нь дүр төрхийг шингээсэн хэрнээ хүчингүй нэгж болохыг МАХН-ын гүйцэтгэх товчооны гишүүн Г.Бямбасүрэн хэлэв. Бараг л тагнуулчтай кино шиг болж үйл явдал өрнөжээ. МАХН гурван жилийн өмнө нэрээ өөрчлөхөд “МАХН-ын гишүүд дэмжигчдийн холбоо” хамт татан буугдах ёстой байсан ч хуурамчаар “амьд үлдсэн” байна. Эдүгээ хоёр намд зэрэг харьяалагдаж буй нь будлиан үүсэх үндэс болоод буй. Үүний нотолгоо нь нэгэн албан бичгээр илэрнэ. Албан бичгийн толгойд шинэчлэгдсэн-урлан бүтээгч МАХН-ын бэлгэдэл сарнайн 15 ширхэг дэлбээтэй тэмдэг байршжээ. Гэтэл баталгаажуулсан тамган дахь тэмдэг нь МАН-ын хуучин тамганы 10 ширхэг дэлбээтэй бэлгэдэл байсан аж. Ийнхүү Б.Цэрэндорж, М.Ганзориг, Г.Баярсайхан нарын эрлийз байгууллага илчлэгдсэнээр кино төгсөх дөхөж байтал дахиад нэг шуугиан дэгдэв. “МАХН-ын гишүүд дэмжигчдийн холбоо” нэртэй намынхаа эсрэг тэмцэгчид ээлжит хэвлэлийн хурлаа хийж байхад бөөн юм болж. Тэмцэгчид зурагтаар ярьж байтал таягтай тэмцэгч дайран орж ирснээр хэвлэлийн хурал бус хэрүүлийн бага хурал болсон нь өнгөрсөн долоо хоногийн сонирхолтой бичлэг байв. МАХН-ын урлан бүтээгчдээс улс төрийн ертөнцөд зориулсан хаврын шоуны дараагийн ангид юу өрнөхийг хэлэхэд эрт. Юутай ч, намын дарга Н.Энхбаяр Онц их хурлаас өмнө “come back” үзэгдлээр үргэлжилж болзошгүй хэмээн “үзэгчид” таамаглаж сууна.