Монгол Улсын Ерөнхийлөгчийн дэргэдэх Иргэний танхимд “Төсвийн харилцаа ба тэнцвэржүүлэх шилжүүлгийн систем” сэдэвт нээлттэй хэлэлцүүлэг боллоо. Швейцарийн хөгжлийн агентлагтай хамтран зохион байгуулсан хэлэлцүүлэгт Швейцарийн төсвийн тэнцвэржүүлэх шилжүүлгийн системийн туршлага, аргачлалаас жишээ татан ярилцсан юм. Энэ ойлголт нь төсвийн төвлөрлийг сааруулахад чиглэсэн арга хэмжээ аж. Өнөөгийн байдлаар Монгол Улсын Их Хурлаас тухайн жилийн төсөв зохиож, баталдаг. Түүнээс аймаг орон нутагт хэдий хэмжээний хөрөнгө хуваарилагдах нь тодорхой болдог тогтолцоотой. Гэвч аймаг, сумын Засаг дарга нар өөрт оногдсон төсөвт тохируулж бүтээн байгуулалт, үйл ажиллагаагаа зохион байгуулдаг нь буруу тогтолцоо аж. Нөгөөтэйгүүр, аймаг, орон нутагт олгох хөрөнгийн хэмжээ харилцан адилгүй байдаг нь ч асуудлын эх үүсвэр. Тухайлбал, Орхон аймагт 80 гаруй тэрбум төгрөг төсөвлөдөг байхад Баян-Өлгийд ердөө есөн тэрбум төгрөг оногддог нь харьцуулах шаардлагагүй зөрүү юм.
Улсын төсөв харилцан тэнцвэртэй байх ёстойг мэргэжилтнүүд онцолдог. Үүний тулд босоо, хэвтээ хэлбэр бий. Мөн үр ашиг болон өртөг зардлыг хянаж тарамдах байдалд дасан зохицох, захиргааны үйл ажиллагааг идэвхжүүлэх, бие даасан хариуцлагын хөшүүрэг, хөгжлийн баримжаа боловсруулах зэрэг олон хүчин зүйл шаардагддаг аж. Товчхондоо, хуваарилалтын үр ашиг, үйл ажиллагааны үр дүн, тэгш байдал, хөгжил гэх замнал руу хөтөлдөг хүчин зүйл нь төсвийн тэнцвэржүүлсэн тогтолцоо юм.
Хэлэлцүүлэгт Ерөнхийлөгчийн Тамгын газрын урилгаар Швейцариас ирсэн Степан Пфөффли “Тэнцвэржүүлсэн төрийн тогтолцоо: Зорилго, сорилтууд ба Швейцарийн туршлага“ илтгэл тавихдаа тэнцвэржүүлсэн төсөвтэй байх нь бүс нутгийн хуваагдмал байдлаас болж үр дүн тарамдах, эдийн засгийн цар хүрээ хумигдах, өрсөлдөөн буурах зэргээс сэргийлж төсвийг зөв зохистой зарцуулахад ач холбогдлоо өгдөг хэмээн онцолсон. Харин Ерөнхийлөгчийн Иргэний оролцоо, эдийн засгийн бодлогын зөвлөх Л.Дашдорж “Монгол Улсын Ерөнхийлөгч Ц.Элбэгдорж эхний бүрэн эрхийнхээ хугацаанд төвлөрлийг сааруулах, орон нутгийн эрх мэдлийг нэмэгдүүлэх, иргэдийн оролцоог дэмжих бодлого явуулсан. Хоёр дахь бүрэн эрхийн хугацаандаа ухаалаг төрийн бодлого санаачиллаа. Иргэдийн оролцоог хангаж хүний эрхийг дээдэлсэн, иргэдийнхээ нийгмийн хариуцлагыг дээшлүүлэхэд чиглэсэн засаглалыг өнөөдөр дэлхий дахинд хамгийн зөв зүйтэй засаглалын тогтолцоо гэж үзэх боллоо. Гэвч одоо ч ядуурал хурц асуудал хэвээр байна. Баян, ядуугийн ялгаа улам бүр нэмэгдэж, байгаль орчин, агаарын бохирдол зэрэг олон сөрөг асуудал гарсаар байна. Эдгээрийг шийдвэрлэх гол арга зам нь хөгжлийн бодлого юм. Хөгжлийн бодлого, иргэдийн оролцоо, орон нутгийн эрх мэдлийг нэмэгдүүлэх асуудал нэг нь нөгөөгүйгээр байж чадахгүй ч ухаалаг төрийн бодлогоор зохицуулах ёстой” гэв.