Улаанбаатар хот 28 мянга шахам га суурьшил бүхий газартай. Үүнээс 79 хувь буюу 22 мянган га газрыг гэр хороолол эзэлдэг байна. Гэр хороололд 186 мянга гаруй өрх ямар ч газар зохион байгуулалтгүй, инженерийн болон дэд бүтэцгүй орчинд амьдарч байгааг Нийслэлийн Засаг дарга Э.Бат-Үүл сэтгүүлчидтэй хийсэн зангиагүй уулзалтын үеэр тодотгов.

Тэрээр ярихдаа, “Газар шинэчлэн зохион байгуулна гэдэг бол гэр хорооллын дахин төлөвлөлтөөс өөр зүйл. Иргэн өөрийн өмчлөлийн газраас инженерийн болон нийгмийн дэд бүтэц, хөрөнгө оруулалтад шаардлагатай талбайг хувь нийлүүлэхийг хэлээд байгаа юм. Тиймээс иргэдийн, газар өмчлөгчдийн хүсэлт, оролцоо, шийдвэрт үндэслэн төсөл боловсруулахаар ажиллаж байна. Иргэд зохион байгуулалтад орж нийт талбай дээр амьжиргааны орон сууц, нийгмийн зориулалттай байгууламжийг хаана, ямар хэмжээтэй барих шийдвэр гаргаж гүйцэтгэгч талтай харилцан тохиролцсоноор төсөл хэрэгжинэ” гэлээ.
ДЭМБ-аас замбараагүй суурьшлаас үүдэлтэйгээр агаар, хөрсний бохирдлын голомтыг үүсгэж нийслэлийн нийт иргэдийн эрүүл мэндэд ноцтой аюул учруулсныг тогтоожээ. Агаарын бохирдлын 50 хувь нь хөрснөөс үүсэх тоосжилт, 35 хувь нь нүүрсний утаанаас үүдэж байгаа аж. Тиймээс иргэд гэр хорооллын газрыг шинэчлэн зохион байгуулахад оролцохоор хүсэлт ирүүлэх болжээ. Тодруулбал 30 мянга орчим иргэн газар шинэчлэн зохион байгуулах төсөлд хамрагдах хүсэлтээ ирүүлжээ.

Түүнчлэн нийслэлд замбараагүй газар олголт гаарснаас болж олон сөрөг үр дагавар үүсч буйг хотын дарга онцолсон юм. Тэрээр НИТХ-аар хууль зөрчин газар олгосон Засаг даргыг огцруулна хэмээн журамд тусгасныг дэмжиж буй аж. Нийслэлийн Засаг дарга иргэд нийлээд газраа шинэчлэн зохион байгуулъя гэвэл хотын төсөв мөнгө хүрэх үү гэсэн асуултад “Төсөв бий. Иргэд төлөвлөлтөө хийгээд, зургаа гаргаад ирвэл төсвийг нь тооцоод ИТХ-аар батлуулна. Төсөвт мөнгө батлалгүй явуулчихаар ажил хоцрох гээд байх юм. Мөнгө батлаад явуулахаар зураг төсөл нь ирдэггүй зовлон байна. Тиймээс манай инженер, төлөвлөлтийн байгууллагууд урьдчилсан тооцоо хийж мөнгө төсөвлөсөн” хэмээн хариуллаа. Төлөвлөлтийг хийхдээ тухайн айлыг нүүлгэхгүйгээр зохицуулах боломжтой бөгөөд бага зардлаар шинэчлэн зохион байгуулалт хэрхэн хийх вэ гэдгийг иргэд өөрсдөө сайн тооцоолох хэрэгтэй гэнэ.