Үндэсний баяр наадмын комисс байгуулагдсанаас хойш гурван ч удаа хуралдан төсөв мөнгөө баталчихсан. Харин одоо хийх ажлуудаа төлөвлөж буй.
Жил бүр Монголын сор болсон найруулагч, уран бүтээлчдээр дэглүүлдэг наадмын нээлт, хаалтын ёслолыг энэ жил хэн найруулахыг Баяр наадмын комиссын нарийн бичиг, ССАЖЯ-ны Соёлын бодлогын хэрэгжилтийг зохицуулах газрын дарга З.Баянзулаас тодрууллаа. Энэ жилийн наадмын нээлт, хаалтын үйл ажиллагааг төрийн шагналт, гавъяат жүжигчин Д.Сосорбарам найруулах нь. Тэрээр өнгөрсөн жилийн баяр наадмын ёслолын ажиллагааг ч мөн хариуцан найруулсан. Түүний найруулсан наадмын нээлтэд 999 уртын дууч нэгэн зэрэг шуранхайлуулж, 999 бүжигчин ардын бие биелгээг нутаг нутгийн онцлогтойгоор бүжиж, туг барьсан цэргүүд Монгол орны газрын зургийг бүтээж байсныг үзэгчид санаж байгаа байх. Харин энэ жил Төрийн соёрхолт Д.Сосорбарамын ур ухаанаар ямархан тоглолт бүтэхийг хүлээх л үлдлээ.