Долдугаар сарын 29-ний өдөр Ерөнхий сайдын зөвлөх Л.Гансүхийг “Нүүрс” хөтөлбөрийн хөрөнгөнөөс хувьдаа завшсан байж болзошгүй гэсэн үндэслэлээр АТГ-аас  баривчлан Төв аймгийн Цагдан хорих байранд саатуулсан билээ. Ерөнхий сайд Н.Алтанхуягийн хувьд энэ баривчилгааг хууль бус хэлмэгдүүлэлт гэж үзэн өчигдөр албан ёсоор мэдэгдэл гаргасан. Тэрээр мэдэгдэлдээ “Ард иргэдэд үр өгөөжөө өгч, амжилттай хэрэгжсэн “Нүүрс” хөтөлбөрийг зогсоох, Засгийн газрын хийсэн ажлын нэр хүндийг унагахын тулд ажил хийсэн хүмүүсийг хэлмэгдүүлж, шоронд хорих хүртэл арга хэмжээ авсан нь Засгийн газрыг ажил хийлгэхгүй байх, хорлон саатуулах үйлдэл болж байна. Тиймээс санаатайгаар, хууль зөрчин, гэмгүй хүмүүсийн эрхэнд халдаж буй үйлдэлтэй Монгол Улсын Ерөнхий сайд миний бие хатуу тэмцэх болно.

Монгол Улсын Засгийн газар аливаа дарамт шахалтыг үл тоон ард иргэдийнхээ төлөө хийж эхлүүлсэн, төлөвлөсөн олон ажлаа үргэлжлүүлэх болно гэдгээ хариуцлагатайгаар мэдэгдэж байна” гэсэн.  Ерөнхий сайд мэдэгдэл гаргасан даруйдаа Хууль зүйн сайдыг дагуулан Төв аймгийн цагдан хорих төвд очин өөрийн зөвлөх Л.Гансүхтэй шоронгийн даргын өрөөнд уулзсан аж. Түүний энэ үйлдэл нь “Нийтийн албанд нийтийн болон хувийн ашиг сонирхолыг зохицуулах, ашиг сонирхолын зөрчлөөс урьдчилан сэргийлэх тухай хуулийн 7 зүйлийн 7.2.4-ийг зөрчсөн гэж АТГ-аас үзэж буй юм. Энэ талаар өнөөдөр АТГ-аас мэдээлэл хийлээ. АТГ-ын удирдлагууд сүүлийн хэдэн өдөр тус байгууллагын нэр хүндэд халдсан худал мэдээлэл хэвлэл мэдээллийн хэрэгслээр цацагдаж шахалт дарамт үзүүлэх нь хэрээс хэтэрч байгааг хэлээд Ерөнхий сайд хууль зөрчин өөрийн зөвлөхтэй уулзсан гэв. Ерөнхий сайд өөрийн зөвлөхтэй уулзах хүсэлтэй АТГ-т илгээсэн ч энэ нь “Нийтийн албанд нийтийн болон хувийн ашиг сонирхолыг зохицуулах, ашиг сонирхолын зөрчлөөс урьдчилан сэргийлэх тухай” хуулийг зөрчиж байгаа гэдгийг хэргийг хариуцагч комиссар Д.Золжаргал албан бичгээр илгээсэн ч үүнийг үл тоон сэжигтэн Л.Гансүхтэй хоёр цаг орчим уулзсан гэнэ. Тиймээс АТГ Ерөнхий сайдын энэ үйлдэлд хариуцлага тооцох ёстой гэж үзэж, Ерөнхий сайдаас мэдүүлэг авна гэдгээ албан ёсоор мэдэгдлээ.