Хүн мал амьтны гоц халдварт өвчин хаа сайгүй гарсаар байна. Өнөөдрийн байдлаар гурван ч газарт ийм шалтгаанаар хорио цээрийн дэглэм тогтоожээ. Тухайлбал Булган аймгийн Сэлэнгэ сумын хоёрдугаар багт 15 өрхийн 128 гахайнд өнгөрсөн сарын сүүлээр халдварт өвчний шинж илэрсэн аж. Халдвар авсан гахайнуудыг устгаж, МЭАЦТЛ-т дээжийг нь шинжлүүлэхэд гахайн сонгомол мялзан өвчин болох нь тогтоогдсон гэнэ. Тиймээс сумын Засаг даргын захирамжаар 30 хоногийн хугацаатай хорио цээрийн дэглэм тогтоожээ. Энэ өвчин нь хүнд халддаггүй ч маш хурдан тархаж олон гахай өвчлүүлэх эрсдэлтэй, халдвар гарсан тохиолдолд шууд устгах заалттай гоц халдварт өвчин. Мөн Булган аймгийн Бүрэгхангай сумын хоёрдугаар багийн нутагт малчин Б-гийн нэг төл халдварт өвчний шинж тэмдэгтэй хорогджээ. Малын сэг зэмийг устгаж дээжийг нь шинжлүүлэхэд боом өвчин болох нь тогтоогдсон байна. Тиймээс тус суманд мөн 14 хоногийн хугацаатай хорио цээрийн дэглэм тогтоожээ. Мал амьтны гоц халдварт боом өвчин нь хүнд халдварладаг юм. Халдвар авсан хүний өвчин хүндэрвэл амь насанд ч аюултай болохыг мэргэжилтнүүд хэлдэг.
Түүнчлэн Өвөрхангай аймгийн Хархорин сумын Шанх багийн нутагт малчин М-ийн нэг үхэр галзуу өвчнөөр өвчилсөн болох нь шинжилгээгээр тогтоогдсоны улмаас 14 хоногийн хорио цээр тогтоогоод байна.