Киргиз улс дэлхийн нүүдэлчдийн анхдугаар их наадам зохион байгууллаа. Киргизийн алдарт Иссык-Куль нуурын хөвөөнд болсон нүүдэлчдийн удмынхны анхдугаар энэ наадамд манай гаригийн 19 орны 22 багийн 430 гаруй тамирчин өрсөлдсөнөөс монголын баг тамирчид тавдугаар байрт шалгарсан байна.

Наадмын үеэр нүүдэлчдйин удмынхан алыш буюу бүсний барилдаан, аламан байге хэмээх уралдаан, жорго салыш буюу хурдан морины уралдаан, казак курош, кок бору  гэдэг тулам булаалдах, кунон чабыш буюу шүдлэн морины уралдаан, кыргыз курош буюу киргизийн үндэсний тоглоом, тогуз коргоол гэдэг хөлөгт тоглоом, эр эниш хэмээх морин дээрх барилдаанаар өрсөлджээ.

Эцсийн дүнгээр киргизийн шигшээ баг 16 алт, 20 мөнгө, 19 хүрэл, нийт 55 медаль хүртэж аваргалсан бол Казахстаны баг тамирчид 10 алт, 9 мөнгө, 9 хүрэл медаль авсан байна. Туркмений баг 9 медаль авч гуравдугаар байр оржээ.

Манай багийнхан нэг мөнгө, зургаан хүрэл медаль авч тавдугаар байрт шалгарчээ. Оросын тамирчид таван хүрэл медаль авсан байна.