УИХ-ын гишүүн Г.Уянга өнөөдөр Төрийн ордны “Г” танхимд сэтгүүлчдэд мэдээлэл хийх үеэрээ Оюутолгой төслийн анхны хөрөнгө оруулалтын асуудал цэгцрээгүй байхад төслийн санхүүжилтийг нэмэгдүүлбэл Засгийн газарт хариуцлага тооцох асуудлыг хөндөнө гэж мэдэгдлээ.
Г.Уянга гишүүн хэлэхдээ, "Оюутолгой төслийн хоёр дахь шатны хөрөнгө оруулалт 4.9 тэрбум ам.доллар хэмээн хэвлэл мэдээллийн хэрэгслээр мэдээлж байсан ч 9 тэрбум ам.доллар болно хэмээн ярих болсон. Бид гэрээгээр баталгаажуулсан анхны хөрөнгө оруулалтыг нөхөөгүй атал хоёр дахин их хөрөнгө зээлээр гаргавал Монгол Улсын төсөв даахгүй. Оюутолгой төсөлтэй холбоотой анхны хөрөнгө оруулалтын хэтрэлт болон олон маргаантай асуудал шийдэгдээгүй байхад нэмж 9 тэрбум ам.долларын өр тавихыг хүлээн зөвшөөрөх эрх бидэнд байхгүй. Үүний 3 тэрбум гаруй ам.доллар нь Монголын тал хариуцах өр болно” гэв.
Тэрээр “Оюутолгой” төслийн анхны хөрөнгө оруулалтын хэтрэлтийг шалгасан ажлын хэсгийн тайланг гар дээрээ аваад байгаа ба түүнд нууцын зэрэглэлийн журмаар хүргүүлсэн гэнэ. Уг шалгалтын мэдээнд төрийн нууцад хамаарах асуудал огт байхгүй, тэгээд ч нэг төслийн мэдээллийг олон нийтээс нуун дарагдуулах шалтгаан байхгүй гэж үзэж байна. Засгийн газар ойрын хугацаанд энэ талын мэдээллийг УИХ-д танилцуулахгүй бол тэрбээр шалгалтын материалыг дэлгэх болно" гэлээ.
