Монгол Улсын Ерөнхийлөгч 158 дугаар зарлигтаа нийгэмд номын ач холбогдлыг ойлгуулах зорилгоор Монгол орон даяар номын баярыг тэмдэглэн өнгөрүүлэхийг уриалсан. Тиймээс энэ жил Өмнөговь аймаг гурав дахь жилдээ уламжлан болгон Номын баяр арга хэмжээг зохион байгуулж байна. 
Энэ удаагийн баярыг аймгийн ЗДТГ-ын нийгмийн хөгжлийн хэлтэс, аймгийн Төв Номын сан, Боловсролын газар болон ССАЖГ нар хамтран “Ном бол оюун санааны тусгаар тогтнол” уриан дор зохион байгууллаа. “Номын баяр-2014” арга хэмжээгээр шилдэг уншигчдыг шагнаж урамшуулах, шилдэг гэрийн номын сан, АХА тэмцээн, номын сангуудын үзэсгэлэн, шилдэг уншигчдын бүтээлийн үзэсгэлэн, шинэ номын үзэсгэлэн худалдаа, хуучин номын худалдаа солилцооны арга хэмжээг зохион байгуулж байна.
“Ном бол ертөнцийг харах цонх мөн” гэж М.Горький нэгэнтээ хэлсэн байдаг. Олон төрлийн ном уншиж, оюун ухаандаа ургуулан, төсөөлөн бодох нь тархины хөгжилд сайнаар нөлөөлж, аливаа асуудалд арай өөрөөр ханддаг болохыг хоёр зууны өмнө Их Британийн эрдэмтэд нотолсон байдаг.Номд хайртай, номыг дээдэлдэг, ном сонирхогч хүмүүсийн хүлээдэг номын баяр ийнхүү амжилттай болж өндөрлөв.
