ОХУ-д мах нийлүүлэх талаар нэг сарын өмнө тус улсын Ерөнхийлөгч Владимир Путины айлчлалын үеэр хоёр улс тохиролцсон. Гэвч Өвөр Байгалын хязгаар Монголын үхрийн махыг импортлохгүй нь байна.

Учир нь өрнөдийн орнуудаас ОХУ-ын эсрэг авсан эдийн засгийн хориг арга хэмжээний уршгаар тус улсын дотоодын үйлдвэрлэгчид хүнд байдалд ороод байгаа аж. Тиймээс дотоодынхоо махны үйлдвэрлэлийг дэмжих замаар хямралыг даван туулна гэж тус хязгаарын Засгийн газрын тэргүүний орлогч бөгөөд Эдийн засгийн хөгжлийн сайд Сергей Новиченко мэдээлжээ.

Түүнчлэн “Махны хомсдолтой байгаа баруун бүс нутгийг манай бүс нутаг бүрэн хангана” гэж тэрбээр хэлсэн байна.

Түүнтэй Өвөр Байгалын хязгаарын парламентын даргын нэгдүгээр орлогч Сергей Михайлов ч санал нэгтэй байгаагаа илэрхийлсэн байна. Тэрбээр хэлэхдээ “бидэнд одоогоор Монголын махыг импортлох шаардлага гараагүй байна”  гэжээ.

Новиченкогийн хэлснээр, Монголын махыг зөвхөн нутаг дэвсгэрээрээ дамжуулан тээвэрлэх боломжтой. Энэ асуудлыг зөвхөн Өвөр Байгалын хязгаарын албан ёсны төлөөлөгчид хэлэлцэх боломжтой бөгөөд тэд 10 дугаар сарын 15-нд хэлэлцээ хийхээр Монголд очно гэж “Чита.ру” цахим хуудсанд мэдээлжээ. Тиймээс бид нэг хэсэгтээ л ОХУ-д мах экспортлох нь горьдлого хэвээр үлдлээ.