Нийслэлийн Засаг даргын Нийгмийн хөгжлийн асуудал хариуцсан орлогч дарга Ц.Энхцэнгэлтэй ярилцлаа.
-Түүхэн ойн өдөр сайн сайхан зүйл ярилцах нь зүйтэй байх. Юм хийж байгаа хүнээр сайныг нь яриул гэх үг ч байдаг. Өнгөрсөн хоёр жилийн хугацаанд нийслэл хотод өөрчлөгдсөн зүйлсээс яриагаа эхэлье?
-Бидний хийж бүтээсэн ажлыг та бүхэн мэдэж байгаа. Засаглалыг сайжруулж иргэдэд нээлттэй байхад түлхүү анхаарсан. Энэ хүрээнд нийслэлийн Засаг даргын санаачилгаар олон ажил хийлээ. Тухайлбал, ажлын үр дүнг тооцох, чиглэлийг тодорхойлоход иргэд оролцдог боллоо. Үүнийг зүгээр ярих бус иргэдийн оролцоог бодитоор хангах үүднээс Захирагчийн ажлын албанаас судалгаанд үндэслэн зураглал гаргалаа. Засаг даргын Тамгын газар дүүрэг хороодтойгоо хамтран эрүүл аюулгүй байдлын индексийг тодорхой аргачлалын дагуу тооцож гаргасан. Цагдаагийн байгууллага ч энэ чиглэлээр ажиллах болсон. Жишээ нь “scool police” буюу сургуулийн цагдаа ажиллуулж эхэлсэн. Орон нутгийн хөгжлийн сангийн хөрөнгөөр гэрэлтүүлэг сайжирч, камерын хяналтыг тодорхой хүрээнд бий болгоод байна. Нийгмийн хөгжлийн чиглэлээр гэхэд саяхан “Найрсаг Улаанбаатар” хөтөлбөр батлагдсан. Аялал жуулчлал, биеийн тамир, соёлын арга хэмжээг өргөн хүрээнд зохион байгуулж, иргэдийн амьдрах орчинг сайжруулъя гэсэн маань эргээд аж ахуйн ашиг орлого бий болгодог байх хэрэгтэй гэх баримтлалаар хөтөлбөр гарсан. Өөрөөр хэлбэл, найрсаг байхын үр шимийг нийт иргэд нь хүртдэг хот байлгах үүднээс тусгай хөтөлбөр боловсруулсан гэсэн үг. Иргэдийн оролцоог хэрхэн хангаж байгааг ч нийслэлчүүд мэдэж байгаа. Наад зах нь сургууулийн захирал, цэцэрлэгийн эрхлэгчийг эцэг эх, сурагчдын оролцоотой сонгон шалгаруулдаг болсон. Сургууль цэцэрлэгийн удирдлага бол нийтийн засаглал гэдэг утгаар иргэдийн оролцоотой сонгож байна. Үүнээс гадна сургууль цэцэрлэгийн хүний нөөц бүрдүүлэхдээ нийгмийн ажилтан хичээлийн эрхлэгч нарыг сонгон шалгаруулж эхэлсэн. Хаагдмал байсан орчин ажил хөдөлмөр эрхлэх сонирхолтой хүмүүст нээлттэй боллоо гэсэн үг. Сурагчдад үйлчилдэг, сургуулийн цайны газрын түрээслэгчийг хүртэл тендерээр сонгон шалгаруулдаг болсон шүү дээ. Ингэснээр орлого нэмэгдэнэ. Удирдлагын зүгээс эрүүл ахуй аюулгүй байдалд стандартын дагуу шаардлага тавих хяналт сайжирна гэж үзсэн.
-Нийслэлийн бүх байгууллага иргэддээ нээлттэй болж өөрчлөгдсөн гэж ойлгож болох уу?
-Цагдаагийн байгууллага ч боловсрол эрүүл мэндийн байгууллага ч тэр ажлаа иргэддээ тайлагнадаг илүү нээлттэй үйл ажиллагаа явуулдаг болох үйл явц явагдаж байна. Мөн “Нээлттэй Улаанбаатар” авлигын эсрэг олон улсын чуулган Улаанбаатар хотноо саяхан болсон. Олон орны төлөөлөл, эрдэмтэн судлаач ирж туршлага мэдлэгээ хуваалцсан их үр дүнтэй арга хэмжээ болсон гэж үзэж байгаа. Чуулганы хүрээнд ашиг сонирхлын зөрчлөөс хэрхэн ангид байх, хэрхэн урьдчилан сэргийлэх, засаглалыг хэрхэн үр дүнтэй байлгах вэ гэдгийг ярилцсан. Өнгөрсөн хоёр жилийн ажлаа хэлэлцэж цаашид авч хэрэгжүүлэх арга хэмжээний төлөвлөгөөг боловсруулсан.
-“Нээлттэй Улаанбаатар” олон улсын чуулганаас гадна Зүүн хойд Азийн хотын дарга нарын чуулган ч Улаанбаатар хотноо болсон шүү дээ. Нийслэл хот гадаад харилцааны тал дээр нэлээд ахиц гаргасан гэж ойлгож байгаа. Энэ тухайд?
-Тиймээ. Зүүн хойд Азийн хотын дарга нарын чуулган зохион байгуулсан. Улаанбаатар хот Зүүн хойд Азийн бусад хоттой хэрхэн хамтран ажиллаж, хамт хөгжиж болох вэ гэдгийг ярилцсан. Мэдээж гадаад харилцааны тал дээр нэлээд том алхмууд хийсэн. Хуучин харилцаатай хотуудтай хамтын ажиллагаагаа эрчимжүүлж байна. Мөн шинээр хамтран ажиллахаар болсон хотууд ч бий. Тухайлбал, Австрийн Венн хот, БНХАУ-ын Бээжин, Английн Лондон хоттой хамтран ажиллах гэрээ хэлцэл хийсэн. Токио хоттой ч мөн хамтын ажиллагааны сувгийг нээгээд байна.
-Зүүн хойд Азийн бизнес аялал жуулчлалын төв гэсэн нэг том зорилт Нийслэлийн нийгэм, эдийн засгийн стратеги төлөвлөгөөнд туссан харагдсан?
-УИХ-аас баталсан Улаанбаатар хотын хөгжлийн төлөвлөгөөнд зааснаар бүсийн аялал жуулчлал бизнесийн төв болоход анхаарч, үйл ажиллагаагаа зориулж ирлээ. Нүүдэлчин хотоос суурин хот болж хөгжсөн нь монголчуудын олон жилийн хөдөлмөрийн үр дүн. Цаашдын чиг хандлага бол Зүүн хойд Азийн бизнес аялал жуулчлалын шинэ төв болох. Мөн монголчуудын хувьд нийгэм, соёл, түүхийн татах хүч болсон иргэд нь эрүүл аюулгүй орчинд амьдардаг засаглал нь нээлттэй иргэдийн оролцоотой тийм сайхан хот болгохын төлөө л ажиллана.
-Дараа жилийн өдийд нийслэлд нийгмийн хөгжлийн чиглэлээр юу өөрчлөгдсөн байх бол?
-2012 оны сонгуульд Нийслэлийн Засаг дарга мөрийн хөтөлбөр боловсруулж орсон. Мөн Ардчилсан намын “5-А” хөтөлбөрийг хэрэгжүүлэх үүрэг бидэнд бий. Мөрийн хөтөлбөрт заасан ажлуудаа үргэлжлүүлэн хийнэ. Дараа жил тавигдах нийгэм эдийн засгийн зорилтоо арваннэгдүгээр сарын сүүлээр НИТХ-аар батлуулна. Тэр үед ирэх жилийн тавигдах зорилт, хэрэгжүүлэх ажил илүү нарийн гарч ирнэ. Дараа жилийн өдийд гэхэд бид хотынхоо нэлээд хэсгийг камерын хяналттай, гэрэлтүүлэгтэй улам сайжирсан, хог хаягдалгүй, гудамж замын цэвэрлэгээ үйлчилгээ жигдэрсэн, цахилгаан хангамж сайжирсан гэхчлэн өргөн хүрээг хамарсан ахиц гарна гэдэгт итгэлтэй байна.
-Нийслэлчүүддээ хандаж хэлэх үг бий байх?
-Нүүдэлчин ард түмэн нийгэм соёл, улс төрийн төв сууринтай болохоор шулуудаж, “Өргөө”-г төвхнүүлснээс хойш 375 жил өнгөрчээ. Хотын иргэд та бүхэн хамтран амьдрах болсныхоо баярыг сайхан тэмдэглээрэй. Бүгдээрээ эрүүл аюулгүй, ирээдүйтэй, хөгжилтэй хотын иргэд байхын төлөө дор бүрнээ хичээж ажиллацгаая. Нийслэлчүүддээ Улаанбаатар хотын 375 жилийн ойн баярын мэнд хүргэе.