Ерөнхий сайдыг огцруулах “үйлсэд” хүчин зүтгэсэн хэмээн Ардчилсан намаас УИХ-д сууж буй нэр бүхий найман гишүүнийг намаас хөөсөн шийдвэр өчигдөр орой гарсан. АН-ын Хяналтын ерөнхий хорооны шийдвэрээр Үндсэн дүрмээ зөрчсөн хэмээн УИХ-ын гишүүн Р.Амаржаргал, Х.Баттулга, Р.Бурмаа, Б.Наранхүү, М.Зоригт, Л.Эрдэнэчимэг, Ж.Батзандан нарыг хөөх тухай тогтоол өчигдөр гаргаад байсан юм. Тэгвэл уг тогтоолоо өчигдөр оройдоо яаран хүчингүй болгосон гэдэг мэдээлэл байна. Яагаад гэвэл эдгээр гишүүнийг намаас хөөвөл огцруулах хуралдаанд оролцоогүй “Шонхор” фракцийнхны хувь заяа ч хамт яригдана. Тэгэхээр үнэхээр хөөгдөгдөх тулбал АН-ын 15 гишүүн АН-ын бүлэгт багтахгүй болж таарна. Үүн дээр Төрийн байгуулалтын байнгын хорооны хуралд эсрэг кноп дарсан АН-ын бүлгийн дарга Д.Эрдэнэбатын “хэрэг” ч сөхөгдөж мэдэх юм. Хамгийн багадаа л гэхэд найман гишүүнээ нэг дор алдвал АН-ын бүлэг цаашдаа хэвийн ажиллах боломжгүй болно. Цаашлаад парламентад олонхий бүлэг үгүй болж, улс төрийн гацаа жинхэнэ утгаараа эхлэх нь. Энэ бүгдийг тооцоолж үзэлгүйгээр яаран гаргасан гишүүдээ намаас хөөх шийдвэрийг хүчингүй болгосон бол үүнтэй зэрэгцээд АН хөдөлгөөнд орж эхэллээ. Түүнээс гадна 2012 оноос хойш ҮЗХ-г хуралдуулж ротаци хийгээгүй Хяналтын ерөнхий хороо өөрөө дүрмийн бус мөртлөө шийдвэр гаргана гэдэг бас л нэг зөрчил рүү хөтөлж байгаа юм.
Өнөөдөр 10 цагт МоАХ хуралдахаар зар тараажээ. Мөн нийслэлийн АН 13 цагт хурал зарлаад байна. Түүнээс гадна ҮЗХ-нд чамгүй суудалтай АЗХ-ныхон өчигдөр хуралдсан. Мэдээж өнөөдөр 15 цагт эхлэх ҮЗХ-ны хуралдаанаас өмнө бүлэг, фракцуудын намын даргын эсрэг санал нэгтгэх ажиллагаа хүчтэй өрнөж байна.