УИХ-ын гишүүн, Хууль зүйн сайд Х.Тэмүүжин парламентад орж ирээд удаагүй байхдаа буюу 2009 оны наймдугаар сарын 14-нд АНУ-ын Элчин сайдтай уулзаж ярилцсан ярианы эх хувь сошиал ертөнцөд тархаж олон хүний гайхшралыг төрүүлж эхэллээ. Тэрээр хуульч гишүүний хувьд хуулийн шинэчлэл, Өршөөлийн тухай хууль зэрэг зарим асуудлыг ярихдаа Ерөнхийлөгчийн санаачилсан хууль мөн түүний хуулийн зөвлөхийн талаар багагүй мэдээлэл АНУ-ын Элчин сайдад өгсөн аж. Америкчуудын флоп гэж нэрлэдэг уулзалтын протокол АНУ-ын төрийн департмент болон Холбооны мөрдөх товчоо бусад байгууллагад илгээгддэг бөгөөд төрийн нууц мэдээллийн хулгайч гэдгээрээ алдаршсан Жулиан Ассанжийн “Wikileaks” сайтад байршуулсан нь Х.Тэмүүжин сайдад эргэлзэхэд хүргэлээ. Эх хувиас нь зөвхөн Ерөнхийлөгчийн хуулийн зөвлөхийн талаар ярьсан хэсгийг нь сонирхож үзлээ.
Элбэгдоржийн хуулийн зөвлөхийн тухайд:
Тэмүүжин Элбэгдоржийг шүүхийн салбарт шинэчлэл хийснээрээ улс төрийн томоохон эрсдэл гаргалаа хэмээн олны өмнө түүнийг сайшаан дэмжиж байсан боловч энэ ярилцлагын үеэр Элбэгдоржийг хуулийн зөвлөхөөрөө Г.Ганзоригийг сонгосонд сэтгэл дундуур байгаагаа ний нуугүй хэлж байв.
Дээд шүүхэд ажиллаж байсан Ганзориг АНУ-д хуулийн чиглэлээр 15 жил ажилласны дараа Монголд ирээд Ерөнхийлөгчийн хүсэлтээр 2009 оны долдугаар сараас хуулийн зөвлөхөөр ажиллаж байгаа. Тэмүүжин Ганзоригийг хуулийн шинэчлэлийн ажлыг нэн тэргүүнд чухалчлан авч үзэх хүн биш гэж үзэж байгаа аж.
Дээд шүүхийн 70-80 хувийн ирц бүрдэх нь бие даасан шүүхийн шинэчлэлийг байгуулах нэг эхлэл болно гэж тэр үзэж байна.
-Парламент одоогоор хуулийн шинэчлэлийг авч хэлэлцэх цаг нь болоогүй гэж Тэмүүжин үзэж байна. Тэрээр Ганзоригийн гол ашиг сонирхол нь хуулийн шинэчлэл биш харин өөрийн хуучин дарга, Дээд шүүхийн дарга Ганбатад туслаж, хуучин албан тушаалд нь эргэн очуулах гэж үзэж байна. Дээд шүүхийн одоогийн дарга Батдэлгэрийг Ганбатаар солих нь шинэчлэлийн эсрэг албан тушаалтныг түүнээс ялгаагүй бас нэг хүнээр сольж буй хэрэг бөгөөд Батдэлгэрээс шүүхийн эрх мэдлийг нөгөөд шилжүүлэх том ажил болно гэж үзэж байна. Батдэлгэр, Ганбат хоёулаа МАХН-ын гишүүн хэмээн АНУ-ын Элчин сайдын протколд бичжээ.
Х.Тэмүүжин сайдын голсон Г.Ганзориг нь 2009 онд Ц.Элбэгдоржийг Ерөнхийлөгчөөр сонгогдсоны дараахан буюу 2009 оны долдугаар сард хуулийн зөвлөхөөр нь томилогдож байжээ. ЗХУ-ын / хуучнаар/ Краснадор хотноо Кубаны их сургууль, АНУ-ын Вашингтон хот дахь Америкийн их сургуулийг хуульч мэргэжлээр төгсөөд Дорноговийн шүүхэд улсын арбитрч, шүүгч, Зүүн баян дахь Ардын армийн тусгай шүүхийн шүүгч, Улсын дээд шүүхийн Цэргийн коллегид шүүгч, Эрүүгийн танхимын шүүгч зэргээр ажиллаж байсан төдийгүй Вашингтон хотноо 10 гаруй жил хуульчаар ажилласан туршлагатай аж.
Кубаны их сургууль нь 1920 онд байгуулагдсан, Оросын шилдэг 100 сургуулийн нэг төдийгүй төгсөгчдөөрөө нэр хүндтэй. Оросын 3000 гаруй дээд сургуулиас шилдэг 100-гийн нэг нь юм. Америкийн их сургууль нь 1893 онд байгуулагдсан, 1914 оноос үйл ажиллагаа явуулсан тэргүүлэх зэргийн биш ч дундаждаа ордог сургууль юм байна.
Мөн Монголын шүүхийн байгууллагуудыг шинэчлэх, шүүгчдийг давтан сургах чиглэлээр АНУ-ын Техас мужийн хуулийн фирмтэй холбоо тогтоож, Монголын Дээд шүүх болон орон нутгийн шүүгчдийг Америкт сургалтад хамруулах ажлыг зохион байгуулж байсан гэнэ. Тэрээр хоёр жил Ерөнхийлөгчийн зөвлөхөөр ажиллаж байгаад Өршөөлийн тухай хууль боловсруулах ажлын хэсэгт хангалтгүй ажилласан гэсэн шалтгаанаар УЕПГ-ын Мэдээлэл дүн шинжилгээ, судалгааны төвийн захирлаар томилсон гэдэг яриа ч бий.
Тэгвэл УИХ-ын гишүүн, Хууль зүйн сайд Х.Тэмүүжингийн боловсрол ажил хийж байсан туршлагыг харъя.
Монгол улсын Хууль зүйн яамны албан ёсны http://www.moj.gov.mn сайтад ингэж бичжээ.
Боловсрол:
• 1979-1989 онд Төв аймгийн 2 дугаар дунд сургууль
• 1994-1998 онд Монгол Улсын Их сургууль, Хууль Зүйн Сургууль тус тус төгссөн.
Ажилласан байдал:
• 1998 оноос МУИС-Хууль зүйн сургуульд багш
• 2004-2008 онд Нээлттэй академи ТББ-ын тэргүүн
• 2005-2008 онд Ардчилсан намын нарийн бичгийн дарга
• 2005-2008 онд Монголын либертари сангийн Удирдах зөвлөлийн гишүүн
• 2006-2008 онд Нээлттэй нийгэм форумын удирдах зөвлөлийн гишүүн
• 2008-2012 онд Монгол Улсын Их Хурлын гишүүн
• 2012 оны VI сараас Монгол Улсын Их Хурлын гишүүн
• 2012 оны VIII сараас Монгол Улсын Засгийн газрын гишүүн, Хууль зүйн сайд
Үүнээс эсрэгээрээ ч юм шиг дүр зураг харагдана...