Зэвсэглэсэн этгээдүүд дэлгүүрт дайран орж, үйлчлүүлэгчдийг барьцаалах үед эр зориг гарган барьцааны хүмүүсийг аварсан Мали улсын иргэн Лассан Батилад Франц улсын иргэншил олгосон байна.

Францын Ерөнхий сайд Мануэль Вальс болон Гадаад хэргийн сайд Бернар Казнев нар франц улсын нийт иргэдийн өмнөөс Батилад эр зоригийн нь төлөө баяр хүргэж паспорт гардуулжээ.
Зэвсэглэсэн лал шашинтнууд супермаркетэд дайран орж ирэхэд дэлгүүрийн туслах ажилтан 24 настай мали эр Лассан зургаан үйлчлүүлэгчийг доод хонгилд нуугаад, цагдаад утасдаж халдлагын тухай мэдэгдсэн юм байна.
Нэгдүгээр  сарын эхээр лалын шашинт Амеди Кулибали калашниковын хоёр ч автомат буугаар зэвсэглэн Парис хотын Венсенсийн дүүрэг дэх супермаркетэд дайран орж гал нээн үйлчлүүлэгчдийг барьцаалсан юм. Энэ үеэр дөрвөн хүн амь үрэгдэж, 15 хүнийг аварсан юм.

Лассан Батила өөрөө лалын шашинт, 2006 оноос Францад амьдарч, өнгөрсөн жил Франц улсын иргэншил хүсч өргөдөл өгсөн гэнэ.