Утааны улирал ид дундаа орж буй энэ үед Эрдэнэт хотод үйл ажиллагаа явуулдаг “Мөнгөн хөндий” компани өөрсдийн бүтээсэн утааны шүүлтүүрийг хэвлэлийнхэнд танилцууллаа. Тус компани гурван жилийн өмнө бүтээсэн утаа шүүгчээ танилцуулахаар хоёр жилийн өмнө Монгол Улсын Ерөнхий сайд, Байгаль орчин ногоон хөгжилийн яамны сайдад хандсан боловч гурав хоногийн дараа ирж уулзаарай гээд таг болжээ. Хэдийгээр нийслэл хотын гол бэрхшээл болсон агаарын бохирдлыг бууруулахад өөрсдийн хувь нэмрээ оруулахаар зохих албаныханд хандсан ч анхаарч үзээгүй учир тэд өөрсдөө хэд хэдэн газар шүүлтүүрээ тавьж, туршиж үзсэн байна. Тухайлбал, Өвөрхангай аймгийн Арвайхээр хот, нийслэлийн БЗД-ийн 68-р дунд сургуульд яндангийн шүүлтүүрээ суулгахад, утаа нь эрс багассан тухай тус компанийн инженер Б.Батбаяр хэлж байна.
Тэдний бүтээсэн утааны шүүлтүүр нь яндангийн хөндийгөөр галын оч, утаа тортог дээш сорогдох үед цахилгаан моторын тусламжтайгаар хорт утааны 90-95 хувийг шүүх замаар ажилладаг аж. Зөвхөн утаа шүүгээд зогсохгүй мөн дулаан алдагдал, түлш зарцуулалтыг эрс багасгана хэмээн зохион бүтээгчид нь хэлж байна. Тиймээс энэ утааны шүүлтүүрийг нийтийн хэрэглээ болгоход төрөөс дэмжиж, санхүүжүүлэхэд туслахыг “Мөнгөн хөндий” компанийнхан хэвлэлээр дамжуулан эрх баригчдаас хүслээ.
