Өвөрмонголын өөртөө засах орны уран бүтээлчид жил бүрийн Сар шинийн баярын үеэр “Энх мэндийн хадаг”-аа дэлгэсээр ирж монгол ахан дүүстэйгээ золгодог болсоор дөрвөн жилийн нүүр үзэж байна. ӨМӨЗО-ны Ардын засгийн газрын Хэвлэл мэдээллийн албанаас уламжлал болгон зохион байгуулдаг “Энх мэндийн хадаг” тоглолтод оролцохоор энэ удаа 50 гаруй уран бүтээлч Улаанбаатар хотноо хүрэлцэн ирээд байна. Өвөрмонголын нэрт дуучин Цэцэгмаа, Халин, “PTS” хамтлагийн уран бүтээлчид, мөн Хүрээ хошууны бүжгийн чуулгын бүжигчид маргааш 17 цагт Соёлын төв өргөөнд болох тоглолтод оролцох ажээ. “Монгол ахан дүүстээ ая дуугаараа Сар шинийн мэндчилгээ дэвшүүлэхээр ирсэн учраас “Энхмэндийн хадаг” тоглолт маань үнэ төлбөргүй. Хүрэлцэн ирж, таалан соёрхоорой” гэж тоглолт зохион байгуулж буй ӨМӨЗО-ны Ардын засгийн газрын Хэвлэл мэдээллийн албаны Суртал ухуулгын газрын дарга Д.Баянжаргал уламжилж байна.
ӨМӨЗО-ны Ардын засгийн газрын Хэвлэл мэдээллийн алба ирэх сарын 2-нд Хятад-Монголын орчуулагчдын их хурлыг Улаанбаатар хотноо анх удаа зохион байгуулахаар мөн бэлтгэж байгаа аж. Хуралд нийтдээ 80 гаруй орчуулагч оролцохоор бүртгүүлжээ.
