"Дэлхийн цирк Монголд-2015" олон улсын шилдэг циркчдийн хамтарсан тоглолтыг хоёр дахь удаагаа зохион байгуулах болсон талаар өнөөдөр мэдээллээ.
Тус тоглолтыг “Монгол Циркийн хөгжлийн төв" ТББ-аас санаачлан Монголын Үндэсний цирктэй хамтран зохион байгуулж байгаа юм.
Тоглолтод Монгол, АНУ, Англи, Канад, Испани, БНХАУ, ОХУ, БНАСАУ, Украин, Вьетнам, Беларусь, Латви зэрэг орны олон улсын нэр хүндтэй өндөр зэрэглэлийн тэмцээний эхний гурван байрын шагналт нийт 60 гаруй жүжигчин оролцоно.
"Монгол Циркийн Хөгжлийн Төв" ТББ-ын тэргүүн Н.Эрдэнэ хэлэхдээ, “Энэ удаагийн тоглолтод үзэгчдийг гайхшруулах циркийн хаан үзүүлбэр гэгддэг агаарын нисэлтийн үзүүлбэрийг хүргэхээр төлөвлөөд байна. Мөн циркийн амь эрссэн номеруудын нэг үхлийн цагираг буюу 10 метрийн өндөртэй төмөр цагариг дээрх үзүүлбэрийг БНХАУ-ын жүжигчид, Испанийн жүжигчид илбийн гайхамшгийг үзүүлэх бол АНУ-аас алиалагч, Вьетнамаас сармагчин, Украинаас 3 метр урт аварга матар, Латвиас ховор үүлдрийн сургуультай нохой ирнэ. Харин манай циркчид агаарт зургаа эргэн дэлхийн рекордыг эвдсэн “Шидэх банзнаас үсрэгчид” номер болон “Аюултай ирвэс” уран нугаралтын номероор оролцоно. "Дэлхийн Цирк Монголд-2015" хэмээх нэрийн тухайд хоёр жилийн өмнө болж байсан тоглолттой андуурч магадгүй. Нэр нь ижил боловч хөтөлбөр, уран бүтээлчид бүгд цоо шинэ шүү” хэмээн онцлов.
"Дэлхийн Цирк Монголд-2015" тоглолт энэ сарын 23-ны өдрөөс эхлэн ажлын өдөр 19.00, амралтын өдөр 15.00, 19.00 цагаас болно.
Тоглолтын тасалбар суудлаасаа хамааран 15, 20, 30 мянган төгрөгийн үнэтэй бөгөөд энэ сарын 9-нөөс эхлэн Монголын үндэсний циркийн кассаар худалдаалах аж.
