Н.БАТ
Улаанбаатар төмөр зам хувь нийлүүлсэн нийгэмлэгийн даргаар Л.Пүрэвбаатар томилогдоод гурван сар гаруй болж буй. Төмөр замын салбарт багагүй жил ажилласан нэгэн учраас нийгэм түүнийг талархан хүлээж авсан. Гэсэн ч энэ долоо хоногийн эхний өдрөөс эхлэн түүний талаарх таагүй мэдээлэл цацагдаж эхлэв. Байгууллагын мөнгөөр гутал авч өмссөн, түүгээр зогсохгүй 200 саяын Лексус-570 маркийн машин унаж, 1,5 тэрбумаар хувийн орон сууц худалдан авсан гэх зэрэг мэдээлэл бүхий Төрийн өмчийн хорооны дарга асан Ц.Нанзаддоржийн гарын үсэг бүхий албан бичиг хүртэл зарим нэгэн мэдээллийн хэрэгсэл болоод сошиал ертөнцөөр тархаад буй. Харин Улаанбаатар төмөр замын хувь нийлүүлсэн нийгэмлэгийн дарга Л.Пүрэвбаатар “одоогоор яг миний гар дээр ийм албан бичиг ирээгүй ээ. Зохион байгуулалттай гүтгэлгийн зүйл” гэсэн хариу өгч байгаа юм.
Тэрээр өөрийнхөө хөрөнгөөр авсан орон сууцанд амьдардаг. Харин ажлын шаардлагаар УБТЗ-д бүртгэлтэй Лексус 570 машин унадаг гэжээ. Машины хувьд 200 сая төгрөгөөр биш 93 сая төгрөгөөр авсан гэдгийг санхүүгээсээ тодруулсан гэв. УБТЗ бол хоёр улсын хамтарсан байгууллага учраас санхүүгийн асуудлыг 50:50 хувиар шийддэг. 2015 оны гуравдугаар сарын 27-нд Төрийн өмчийн хорооны дарга гарын үсэг зурсан дээрх албан бичгийн талаар одоогоор тайлбар өгөх нэгэн олдохгүй байна. Учир нь өнгөрсөн даваа гарагийн Засгийн газрын хуралдаанаар Төрийн өмчийн хорооны дарга Ц.Нанзаддорж өөрийн хүсэлтээр ажлаас чөлөөлөгдсөн байна. Ямар ч байсан энэ асуудалд албаныхан албан ёсны тайлбар өгөх бизээ.
