Олон улсын хөл бөмбөгийн холбоо ФИФА-д дураар авирладаг жинхэнэ анарх байдал ноёрхоод байгаа хэмээн Аргентины шигшээ багийн довтлогч байсан нэрт хөл бөмбөгчин Диего Марадона үзэж байна. Тэрээр энэ бүхэнд энэ байгууллагын тэргүүн Йозеф Блаттер буруутай гэжээ.
“ФИФ-д дураар авирлах явдал хэрээс хэтрээд байгааг хөлбөмбөгийн ертөнц бүгд мэдэж байгаа ч харин Блаттер энэ талаар юу ч мэдэхгүй байна. Ийм ч болохоор би Иорданы хан хүү Али бин Аль-Хусейныг ФИФА-гийн ерөнхийлөгчид нэр дэвшиж байгааг дэмжиж байгаа юм” гэж Марадона хэлжээ.
Олон улсын хөлбөмбөгийн холбооны  ерөнхийлөгчийн сонгууль тавдугаар сарын 29-нд Швейцарийн Цюрихт болох ФИФА-гийн  конгрессын үеэр болох юм. Олон улсын хөлбөмбөгийн холбооны ерөнхийлөгчид Али бин Аль-Хусейнаас гадна Нидерландын хатан хааны хөлбөмбөгийн холбооны тэргүүн Михаэл ван Праг, португалийн хөлбөмбөгчин асан Луиш Фигу нар нэрээ  дэвшүүлээд байгаа юм.