Хамтын халуун сэтгэл залуусын нэгдлийнхэн жил бүрийн зургадугаар сарын 1-нд Эх үрсийн баяраар хүүхэд багачуудаа баярлуулахаар алиалагч нарын парад арга хэмжээг зохион байгуулдаг билээ. Хүүхдийн баяраар хөөрхөн бяцхан үрсдээ баяр хөөр нэмэх алиалагч нарын парад энэ удаад ч мөн зургадугаар сарын 1-нд болох гэнэ. Өнгөрсөн жил 300 алиалагч сайн дураараа цугласан бол энэ жил 500 алиалагч цуглуулахаар төлөвлөжээ.  Одоогийн байдлаар тус Хамтын халуун сэтгэл залуусын нэгдлийнхэнд 300 алиалагчийн хувцас бэлэн байгаа бөгөөд үлдсэн 200 алиалагчийн хувцсыг өөрсдөө оёж бэлдэн арга хэмжээгээ зохион байгуулах нь. Бяцхан хүүхдүүдээ баярлуулангаа өөрсдөө ч бас нэг өдрийг эргэн хүүхэд болсон мэт баярлаж, хүүхдүүдийг баярлуулах чинь хүсэлтэй залуус маань алиалагч нарын парад зохион байгуулах баг бүрдүүлэх уулзалтаа энэ сарын 11-нд хийхээр болсон байна. Дашрамд сонирхуулахад, хамтарч зохион байгуулах клуб болон хувь хүн бүрт уг уулзалт нээлттэй гэнэ.