Тун удахгүй олон улсын хүүхдийн эрхийг хамгаалах өдөр тохионо. Уг өдрийг манай улс хүүхдийн эрхийг хамгаалах өдөр гэхээсээ илүү баяр хэмээн тэмдэглэдэг уламжлалтай. Энэ жил баярыг хэрхэн тэмдэглэн өнгөрүүлэх, хэдий хөрөнгө мөнгө зарах талаар Нийслэлийн Соёл урлагийн газраас ирүүлсэн мэдээнд  Монгол Улсын Гавьяат жүжигчин дуучин Т.Ариунаа нэг дууг 2,5 сая төгрөгөөр дуулах тооцоо гаргажээ. Мөн хөгжим, тоног төхөөрөмжийн зардал дөрвөн сая төгрөг гэх мэтчилэн төсөв гаргасан байх юм. Уг нь НҮБ-ын хүүхдийн элч дуучин гэдэг дуучин Т.Ариунаа хүүхэд багачууддаа  зориулж ганцхан  дууг 2.5 сая төгрөгөөр дуулах юм байна. Эдийн засаг хямарч, ард иргэдийн амьдрал хэцүү байгаа хэмээн  төсөвөө танаж бүсээ чангалах талаар дээр дооргүй л ярьцгааж байна. Гэтэл хүүхдүүдэд гэсэн нэрийн дор нэг дуучны ганц  дуу сонсох гэж бид татварын мөнгөнөөсөө 2.5 сая төгрөг төлөх гэж үү.
Ер нь манай урлаг соёлынхон хүүхдийн буянаар овоо юмтай болсон хүмүүс. Тэгээд ч хүүхдийн төлөө за гэж хэлье хэмээн уриалдаг хүн багачууддаа баярын нь өдрөөр ганц дуу дуулаад өгөхдөө тэдний аав ээжийн төлсөн татвараас ийм төлбөр нэхсэн байх юм.
Энэ талаар нийслэлийн Засаг даргын нийгмийн асуудал хариуцсан орлогч Ц.Энхцэнгэлээс тодруулахад  “Захирамжаар гарна. Захирамжаар хэдий хэмжээний хөрөнгө гаргах талаар тодорхой болно. Төсөв хөрөнгийг нь  шалгаж хянаж үзээд өнөө маргаашгүй тодорхой болгох байх аа” гэсэн бөөрөнхий хариу өглөө.
“Хүүхдийн элч” дуучин маань хүүхэд багачууддаа ингэж үнэрхэв үү, манай төрийнхөн ахиухан мөнгө төлөвлөж байгаад дундаас нь “цавчих” гэж байна уу.