Дээрхийн гэгээн, XIY Далай лам энэ долдугаар сард Монгол Улсад морилон ирнэ гэж байсан ч хятадын дарамт шахалтаас болоод өөрчиллөө гэж японы Kyodonews агентлаг мэдээлсэн байна.
Өнгөрсөн оны арван хоёрдугаар сард Далай лам Дарамсала дахь өөрийн ордондоо монголчуудад зориулан ном сургааль айлдахдаа 2015 онд Монгол оронд очиж сүсэгтнүүдтэйгээ уулзана хэмээн амласан юм байна.

Kyodonews агентлагийн мэдээлснээр бол буддын шашны тэргүүнийг монголд айлчлуулахгүйн тулд Монголын гол хөрөнгө оруулагч Хятад улс монголын эсрэг эдийн засгийн хориг арга хэмжээ авна гэсэн юм байна. Өөр нэг эх сурвалжийн мэдээлснээр Далай лам нууцаар монголд айлчилна гэсэн байгаа ч монголын хэвлэлүүд энэ талаар мэдээлээгүй байна гэжээ.

Далай лам монголын нийслэл Улаанбаатарт буддын шашны Дүйцэн өдрийн өмнө айлчлахаар төлөвлөж байж. Харин монголын Гандантэгчинлэн хийдийн төлөөлөгч Бүрнээ лам болохоор Далай ламыг монголд ирэхгүй, сургааль номоо  интернетээр дамжуулан сүсэгтэн олондоо хүргэнэ гэсэн байна.
Дээрхийн гэгээн хамгийн сүүлд 2011 онд Гандантэгчинлэн хийдийн урилгаар морилсон юм. Энэ үеэрээ далай лам сүсэгтэн олондоо “Шинэ мянганы сургааль”-иа хайрласан юм.

Гурван сая хүнтэй монгол улсын хүн ам бүхэлдээ буддын шашныг шүтэж, далай ламын ихэд биширч хүндэлдэг юм. Монголын шарын шашны хийдүүдэд Дээрхийн гэгээнд зориулан тусгай суудал засан өнгөт зургийг нь байрлуулж, цэцгээр чимсэн байдаг.

БНХАУ болохоор Далай ламыг Түвдийн салан тусгаарлагчдын албан ёсны бус тэргүүн гэж зарласан юм.
Хятадын Засгийн газраас 1959 онд Төвдийн иргэдийн хятадын эсрэг бослогыг цэргийн хүчээр дарсны дараа  Далай лам Энэтхэгт дүрвэн Дарамсалад амьдарч байгаа юм хэмээн  newsru.com сайт мэдээлжээ.