Л.БАТБААТАР
Дархан өртөөний наана байрлах Цайдам
зөрлөгийн 143 дугаар километрийн гарам дээр өчигдөр (уржигдар) портер
галт тэрэгний урдуур орж, дайруулсан осол болсон. Үүний улмаас машинд
сууж явсан хоёр иргэн амь насаа алдсан билээ.
Энэ талаар “Улаанбаатар төмөр зам” хувь нийлүүлсэн нийгэмлэгийн даргын орлогч Ч.Эрдэнэдалайгаас тодрууллаа.
-Төмөр замын ослын хэмжээ буурахгүй байна. Он гарсаар найман иргэн төмөр замын ослоор амь насаа алдсан гэсэн мэдээлэл байна?
-Иргэд
галт тэргэнд дайруулах, төмөр замын гарман дээр автомашин галт
тэрэгтэй мөргөлдөх зэрэг осол сүүлийн үед нэг биш гарч байгаа. Цайдам
зөрлөгийн гарам дээр өчигдөр машин галт тэргэнд мөргүүлсний улмаас
хоёр иргэн амь насаа алдсан эмгэнэлтэй хэрэг гарсан. Ер нь, галт
тэрэгний ослын талаар Төмөр замын Тээврийн хяналтын албанаас хийсэн
судалгаагаар 2015 оны эхний найман сарын байдлаар галт тэрэгний ослын
улмаас найман иргэн амь насаа алдсан байна. Ер нь, жил бүр 10 гаруй
иргэн анхаарал болгоомжгүйн улмаас галт тэрэгний ослоор амь насаа алдаж
байна.
-Осолд орсон иргэдийн буруу, эсвэл галт тэрэгний
машинистын алдаа болоод хэрэг тэгсгээд л өнгөрдөг. Гол шалтгаан,
нөхцөлийг нь тодруулж, анхааруулга өгдөг биз дээ?
-Төмөр зам дээр
осол болсон тохиолдолд хамгийн түрүүнд Цагдаагийн байгууллагын
ажилтнууд ирж, хэргийн газарт үзлэг хийдэг. Мөн төмөр замын
мэргэжилтнүүд үзлэгийн акт үйлддэг. Төмөр замын зүгээс осол болоход
дохиолол байгууламж хэвийн ажилласан эсэх талаар актад тусгадаг. Төмөр
зам дээр байх гармуудыг норм, стандартын дагуу хийж гүйцэтгэдэг.
Гармуудыг төмөр замаар дайран өнгөрөх галт тэрэгний тоо, гармаар нэвтэрч
буй автомашины тооноос хамааруулан 1-4 зэрэг хүртэл ангилсан байдаг.
Нэг, хоёрдугаар зэргийн гарам нь буудаг, сөхөгддөг хаалт, жижүүртэй.
Эдгээр гармыг нь хот, суурин газарт байгуулдаг. Хээр, хөдөө байрлах
гармуудад гэрлэн дохио тавьдаг. Галт тэрэг гарамд 800-1000 метр зайд
ойртоход “галт тэрэг ирж байна” гэсэн мэдээллийг өгдөг. Мэдээллийн
үндсэн дээр гармын хоёр улаан гэрэл асч анивчин, хонх дуугарна. Энэхүү
дохиоллын системийг ямар ч алдаа мадаггүй ажиллуулах үүргийг төмөр зам
хүлээдэг юм.
-Энэ дохиолол нь ажиллахгүйн улмаас осол гарч байна гэж ойлгож болох уу?
-Дохиолол
хэвийн ажиллаж байхад ч осол гарч байна. Жолоочийн сахилга бат
хариуцлага, хууль эрх зүйн мэдлэг дутуу, гармын дохиоллыг
ойлгодоггүйгээс болж осол гардаг. Осол болсон бүх тохиолдлыг судалж
үзсэн. Осол гарсан бүх тохиолдолд төмөр замын дохиоллын систем ажиллаж
байсан. Төмөр замын болон Цагдаагийн ажилтнуудын хийсэн актад дохиолол
хэвийн ажиллаж байсан гэж тэмдэглэгдсэн байдаг.
-Давтан асууя. Өчигдөр болсон ослын үед гармын дохиолол ажиллаж байсан уу?
-Ажиллаж
байсан. Холбооны механик, замын мастер, зүтгүүрийн машинист, орон
нутгийн цагдаагийн албан хаагчдын хамтарсан комисс гармын хоёр улаан
гэрэл ээлжлэн анивчин, хонх дуугарч байсан гэдгийг актаар
баталгаажуулсан. Жолооч нар өөрийн анхаарал болгоомжгүй, тэсвэр
тэвчээргүйн улмаас галт тэрэгнээс өмнө амжиж гармаар нэвтрэх гэснээс
болж ийм эмгэнэлтэй осол гарч байна.
-Галт тэрэгний тоормослох хугацаа?
-Галт
тэрэгний машинист ямар нэгэн саадыг харж яаралтай тоормослодог.
Тоормослоод зогсох зай нь галт тэрэгний хурд, жин, замын өгсүүр,
уруугаас шалтгаалж янз бүр байдаг. Тоормослоход 400 метрээс наана
зогсохгүй.
-Гадны улс оронд төмөр замын гарам нь автомашины
замтай нэг түвшинд барагтай бол огтлолцдоггүй. Нүхэн гарц хийх
боломж хэр байдаг вэ?
-Төмөр замтай нэг түвшинд огтлолцсоноос
болж осол гарч буй гармыг аль болохоор нэмж байгуулахгүй байх, зарим
нэгийг нь татан буулгах чиглэлээр ажил хийж байгаа. Жишээлбэл, Скай
ресортын хажууд гүүр баригдсан. Энэ гүүр баригдсанаар Хүрхрээгийн
гармыг татан буулгасан. Тус гарам дээр хоёр жилийн өмнө галт тэрэг
машинтай мөргөлдсөний улмаас онхолдсон том осол гарч байсан юм.
Улаанбаатар төмөр зам автомашины замтай огтлолцсон гармыг шинээр
нээхгүй, байгааг нь багасгах бодлого барьж ажиллаж байна.
-Осол гаргасан машинистын бурууг яаж тогтоодог вэ?
-Цайдам
зөрлөгийн гармын осолд Цагдаагийн байгууллагаас эрүүгийн хэрэг үүсгэн,
мөрдөн байцаалтын ажил явуулж эхэлсэн. Машинист буруутай үйлдэл хийж
үү, эсвэл дүрэм, журмын дагуу ажилласан эсэх талаар хөндлөнгийн
экспертүүд дүгнэлт бичнэ. Үүний дараа машинистын буруу, зөв эсэхийг
тогтооно. Нэмэлт асуудал гарвал шүүх шийдвэрлэнэ.