“Монголын төмөр зам” төрийн өмчит компанийн данснаас гадаад шилжүүлгээр хийгдсэн гүйлгээний түүвэр гэх тайлбартай хүснэгт хаанаас ч юм гарч ирэв. Хүснэгтэд, “McKinsey & consulting company” руу 2011 онд дөрвөн удаагийн шилжүүлгээр нийт 3.2 сая ам.доллар шилжсэн гэдгийг бичжээ. Харин “Монголын төмөр зам” төрийн өмчит компанийн гүйлгээнээс онцолж, ганц хоёрыг нь олон нийтэд харуулж байгаа нь цаанаа мөнгө угаах гэмт хэргийг илчилж байгаа үйлдэл гэнэ. Өөрөөр хэлбэл, “Монголын төмөр зам” компанийн удирдлагууд (2011 оны) нэр бүхий компаниуд руу мөнгө шилжүүлэн гадаадад очиж угаагаад, буцаагаад хувийн дансаараа авдаг гэдгийг нотлох баримт гэж барин тавин хэлж байгаа юм. Гэхдээ энэ шуугиан гэнэтхэн эхэлчихсэн юм биш. Аль 2011 онд ч “Шинэ төмөр зам” төслийн ТЭЗҮ бэлтгэх нэрийдлээр мөнгө угаасан гэх шүүмжлэл гарч байсан.
Тухайлбал, “Өглөөний сонин”-ы 2014 оны есдүгээр сарын 24-ний дугаарт “...2011 оны гуравдугаар сарын 1-ний өдөр “Монголын төмөр зам” төрийн өмчит компанийн ТУЗ хуралдаж, АНУ-ын алдарт “McKinsey& company” гэдэг компанийг Даланзадгад-Чойбалсангийн чиглэлийн 1100 км замын зөвлөхөөр авсан. ...АНУ-ын “McKinsey” гэдэг дэлхийд алдартай зураг төслийн компани бол бий. Харин тэдний охин юм уу, хараат “McKinsey & company” гэсэн нэртэй Хятад улсад бүртгэлтэй компани байдаггүй гэх яриа хүчтэй гараад байгаа юм. ...“McKinsey” компанийн нэр дээр төгсгөл нэмээд Хятадад бүртгүүлэн зөвлөх үйлчилгээ авсан юм биш байгаа...” гэж бичжээ. Мөн “..МИАТ-ийн экс удирдлагууд Хонконгт даатгалын компани хуурамчаар байгуулаад тэр рүүгээ мөнгө шилжүүлж байсан билээ. Тэгээд тэр мөнгөө Хонконгт очин хувааж авсан” шиг зүйл болохгүй байгаа гэдгийг хууль, хяналтын байгууллагад сануулсан байгаа юм.

Гэхдээ энэ нийтлэл ташаарсан гэдгийг тус компанийн Ази дахь Олон нийтийн харилцаа хариуцсан захирал Пэнни Бөрт нийтлэл гарсны дараа долоо хоногийн дотор мэдэгдсэн байдаг. Тухайлбал, “”Монголын төмөр зам” төрийн өмчит компани нь олон улсад зөвлөх үйлчилгээ үзүүлдэг, үнэн бодит “McKinsey & company”-тай төсөл хэрэгжүүлэх зорилгоор Монгол Улсын хууль эрх зүйн хүрээнд хүлээн зөвшөөрөгдсөн гэрээ байгуулж ажилласан бөгөөд энэ төслийг “McKinsey & company”-ийн Шанхай  ба Бээжингийн салбар болох “McKinsey & consulting company” хариуцан гүйцэтгэсэн билээ” гэж мэдэгдээд хуурамч компани гэсэн мэдэгдлийг залруулахыг шаардаж байсан. Олон улсад нэр хүндтэй компанийг мөнгө угаасан эсвэл хуурамч зэргээр хэвлэлээр бичих нь тус компанийн нэр хүндэд халтайгаас гадна, явуулж буй үйл ажиллагаанд нь саад бэрхшээл тулгарах бодит аюул бий. Тиймээс хэрэг нэгэнт эцэслэн шийдэгдээгүй бол компани болоод хувь хүний нэр хүндэд халдах нь хуулиар хориотой байдаг билээ. Гэвч, энд дахин нэг хуурамч компани Монголын томоохон бүтээн байгуулалтын ажилд оролцсон гэх шуум тархав.



“Шинэ төмөр зам” төслийн хүрээнд төмөр зам барих компаниар шалгарсан “Samsung CT corporation” компанийг хуурамч гэх албан бус мэдээлэл тарж байна. Мөн “Samsung CT corporation” нь 2012 оны арванхоёрдугаар сарын 26-нд байгуулагдсан байхад эрх үүрэг шилжүүлэх гэрээнд 2012 оны арванхоёрдугаар сарын 11-нд шалгаруулж эцэслэн тохиролцсон тухай бичигдэж. Өөрөөр хэлбэл, энэ компанийг байгуулагдаагүй байхад төмөр зам барих ажилд шалгаруулсан гэх. Гэвч, энэ компанитай холбоотой хэргийг прокурорын газраас шалгаж, хэрэг үүсгэхээс татгалзсан тухай баримт байдаг.

Тухайлбал, иргэн Л.Даваапил гэгч БНСУ-ын “Samsung CT corporation” компанийг Ухаа худаг-Гашуун сухайт чиглэлээр төмөр замын ажил гүйцэтгүүлэх гэрээ байгуулахдаа хэт өндөр төсөв буюу 3.6 тэрбум төгрөгөөс их хэмжээний хөрөнгийг луйвардаж байна гэж хуулийн байгууллагад хандан шалгуулсан юм. АТГ болоод нийслэлийн прокурорын газраас энэ гомдлыг шалгаж, Эрүүгийн хэрэг үүсгэхээс татгалзсан. Харин хэрэг үүсгэхээр цуглуулсан баримтад нэг сонирхол татах зүйл байгаа. Энэ нь тус компанийг байгуулаагүй байхад төмөр зам барих ажилд шалгаруулсан гэдэгтэй холбоотой байсныг тодруулъя.

“Samsung CT corporation” нь 2012 оны арванхоёрдугаар сарын 26-нд байгуулагдсан байхад эрх үүрэг шилжүүлэх гэрээнд 2012 оны арванхоёрдугаар сарын 11-нд шалгаруулж эцэслэн тохиролцсон нь ашиг сонирхлын зөрчилтэй тухай “Өдрийн сонин”-ы өчигдрийн дугаарт нийтлэгдсэн.

Гэвч,  БНСУ-ын “Samsung CT” компанитай “Энержи ресурс” компани нь 2012 оны аравдугаар сарын 11-ний өдөр гэрээ хийсэн байдаг аж. Өөрөөр хэлбэл, БНСУ-ын компани нь эхлээд “Энержи ресурс” компанитай төмөр замын суурь бүтэц байгуулах гэрээ хэдийнэ хийсэн байсныг Прокурорын тогтоолд дурдсан байгаа юм. Харин дараа нь буюу 2012 оны арваннэгдүгээр сарын 03-ны өдрийн Засгийн газрын 121 дүгээр тогтоолоор төмөр замын суурь бүтцийг барих тусгай зөвшөөрлийг Монголын төмөр зам төрийн өмчит компанид олгосон билээ. “Монголын төмөр зам” компанид Ухаа худаг-Гашуун сухайт чиглэлийн төмөр замын ажил шилжихэд “Samsung CT” болоод  “Энержи ресурс” хоёрын хооронд хийгдсэн гэрээнд заасан үнийн дүнд ямар ч өөрчлөлт ороогүйг мөн нийслэлийн прокуророос тогтоожээ.

Тэгэхээр төмөр замын бүтээн байгуулалтад хэдий хэмжээний мөнгө зарцуулж, ямар компаниар хийлгэх вэ, гэдгийг “Монголын төмөр зам” компаниас өмнө “Энержи ресурс” шийдчихсэн байсан гэдгийг Нийслэлийн Прокурорын газрын 2013 оны арваннэгдүгээр сарын 28-ны тогтоолоос харж болох юм.