Өнгөрсөн долоо хоногт “Өдрийн сонин”-д ““Шинэ төмөр зам төсөл”-ийн 42 сая ам.доллар БНСУ-д угаагдан буцаж орж ирснийг баримтаар тогтоожээ” гэсэн гарчиг бүхий нийтлэл гарсан. Уг нийтлэлтэй холбоотойгоор “Өдрийн сонин”-ыг шүүхэд өгсөн байна. Энэ талаар өмгөөлөгч Д.Пүрэвбаатартай холбогдож тодрууллаа.
-“Өдрийн сонин”-ыг бусдыг гүтгэсэн гэх үндэслэлээр шүүхэд өгсөн гэдэг мэдээлэл байна?
-Иргэн Баттулгыг “Шинэ төмөр зам” төслөөс 42 сая ам.доллар угаасан гэж үндэслэлгүйгээр гүтгэж, нэр төрд нь халдсан хэмээн үзэж “Өдрийн сонин”-ыг Сүхбаатар дүүргийн шүүхэд өглөө. Бусдын нэр төрд халдсан учраас хариуцлага хүлээх ёстой.
-Заавал шүүх, цагдаа гэлгүй эв зүйгээр учраа олж, ойлголцож, залруулга гаргах боломж байгаагүй хэрэг үү?
-“Өдрийн сонин”-ыхон ярилцаад ойлголцох талаас нь хандаагүй. Ер нь үл тоох байдлаар хандаж, эв зүйгээр ярилцах боломж өгөөгүйг хэлэх хэрэгтэй. Бусдыг гүтгэж, нэр төрд халдсан учир “Өдрийн сонин”-оос нэг тэрбум төгрөг нэхэмжилж байгаа.
-“МакКейнзи” компани бас баримт шаардаж, залруулга гаргахыг хүсч байсан. Тэдний хувьд асуудалд хэрхэн хандаж байгаа мэдээлэл танд байна уу?
-“МакКейнзи” компани Монголд суугаа АНУ-ын Элчин сайдын яамаар дамжуулан мэдэгдэл гаргасныг сонин хэвлэлд дээр нийтэлсэн байсан. Улс төрийн зорилгоор ийм мэдээлэл түгээж байгаа нь цаанаа хоёр улсын харилцаанд сөргөөр нөлөөлөх эрсдэлтэй. АНУ-ын Элчин сайдын яам улс орноо Монголд төлөөлөх бүрэн эрхтэй. Гэтэл Америкийн компанийг нь удаа дараа гүтгэж байгаа явдалд Элчин сайдын яам нь байр сууриа илэрхийлж байна гэдэг хоёр улсын харилцаанд нөлөөлөхгүй гэх баталгаа үгүй. Энэ нь цаашлаад Монголын Ардчилал, ардчилсан Ерөнхийлөгч, ардчилсан парламентад хор уршигтай зүйл болох эрсдэл бий.
