Умард Солонгосын эрх баригчид үүрэн телефоны оператор Koryolink компанидаа улсынхаа бүх дугаарыг 191-ээр эхэлдгийг болиулж 1912-оор эхэлдэг болгохыг тушаажээ. Ингэснээр БНАСАУ-ыг үндэслэн байгуулагч, мөнхийн ерөнхийлөгч Ким Ир Сений төрсөн өдрийг бэлгэдэж, утсаар ярьсан дотоод гадаадын хэн ч гэсэн Ким Ир Сенийг дурсан хүндэтгэж байх юм гэнэ.
The Guardian  хэвлэлийн мэдээлснээр бол тус улсын өөр нэг өрсөлдөгч Kangsung Net компанийн эхлэх дугаар 195 хэвээр үлдэх юм байна.
Үүрэн телефоны Koryolink компанийн гар утсыг умардын 2,5 сая хэрэглэгч, үүн дотроо элит хэсгийнхэн голдуу барьдаг,  гурван сарын хугацаанд 35 центийн төлбөр гардаг гэнэ.

Умард Солонгос БНАСАУ-ыг үндэслэн байгуулагч Ким Ир Сенийг өнөө хүртэл тахин шүтэж Аугаа их удирдагч, Үндэстний нар, Бүхнийг ялагч төмөр жанжин, Бүгд найрамдах улсын хүчирхэг маршал, Хүн төрөлхтнийг чөлөөлөгч, Эцэг хэмээн нэрийддэг юм. Ким Ир Сенийг нас барснаас хойш дөрвөн жилийн  дараа 1998 онд түүнийг БНАСАУ-ын мөнхийн ерөнхийлөгчөөр томилсон юм. Өнөөдөр БНАСАУ-г түүний ач хүү Ким Чен Ун удирдаж байгаа юм.