Э.ГАНЦЭЦЭГ

Швейцарын Давос хотноо 49 дэх удаагийн “Эдийн засгийн чуулган” энэ сарын 20-23-нд болж өнгөрлөө. Тус чуулга уулзалтад эдийн засгийн асуудлаар яриа, хэлэлцүүлэг өрнөхөөс гадна урлаг, спортын арга хэмжээ ч зохиогддог. Өнгөрсөн жилийн соёлын арга хэмжээний хүрээнд Солонгосын дуучин PSY “Ганнам стайл”-аараа олныг хөгжөөсөн бол энэ жил манай улсаас дуучин, поп дива С.Наран оролцлоо.

Тэрээр “Давос-2015” чуулганд урилгаар дуулж байгаа бөгөөд үүнийхээ дараагаар Европын хэд, хэдэн оронд тоглолт хийх юм. Тодруулбал, энэ сарын 29-нд Германы Франкфурт, 30-нд Шведийн нийслэл Стокхолм, 31-нд Гёотэбүргт тоглох юм.
Тэрээр Монгол, Англи, Хятад, Япон, Орос гээд таван хэл дээр цомог гаргаж байсан билээ. Монголын рок, поп урлагт 20 гаруй жил зүтгэхдээ “My voice”, “Lets party”, өөрийн хит уран бүтээлүүдээ багтаасан “Best of Naran” гээд цөөн хэдэн цомог гаргасан байдаг. Энэ тухайгаа “Олон дуу, олон цомог гаргалаа гээд мэргэжлийн уран бүтээлч болчихгүй. Цөөн боловч гаргаж байгаа бүтээл бүр нь чанартай байх учиртай” хэмээн хэвлэлд өгсөн ярилцлагандаа дурдсан байдаг.