-Өлсгөлөн зарласан гэдгийг нь ар гэрийнхэн нь мэдээгүй-
Б.ШИРНЭН
Сайншандын аж үйлдвэрийн цогцолбор төслийн хүрээнд Байгаль орчны үнэлгээ хийх ажлаас их хэмжээний мөнгө угаасан хэрэгт холбогдон шалгагдаж байгаа Г.Түвшинжаргал Шүүхийн шийдвэр гүйцэтгэх Ерөнхий газрын харьяа Цагдан хорих 461-р ангид өлсгөлөн зарлажээ.
Хөхүүл хүүхэдтэй тэрээр Монгол Улсын Ерөнхийлөгч Ц.Элбэгдорж эхийн цагаан сүүний ард хор, хулгай хоёроо хийх нуух ёсгүй гэж хэлсний дараа өлсгөлөн зарлахаа мэдэгдсэн ч яг хэзээ, гэдэг нь тодорхойгүй байсан юм.
Түүнийг өлсгөлөн зарласантай холбогдуулан өмгөөлөгч Д.Пүрэвбаатараас тодруулга авав.
Д.Пүрэвбаатар: Түүнээс ганцхан удаа мэдүүлэг авсан
-Таны үйлчлүүлэгч өлсгөлөн зарлах гэж байгаа тухайгаа таниар дамжуулан олон нийтэд мэдэгдэж байсан. Гэвч, албаны байгууллага өлсгөлөн зарлаж байгаа гэх мэдээллийг бататгахгүй байна. Яг өлсгөлөн зарласан уу?
-Би дөнгөж сая Цагдан хорих 461-р ангис ирлээ. Миний үйлчлүүлэгч Г.Түвшинжаргал өчигдөр буюу ням гарагийн өглөө Цагдан хорих 461-р ангийн захиргаанд өлсгөлөн зарлах тухай өргөдөл өгөөд албан ёсоор өлсгөлөн зарлалаа гэдгээ мэдэгдсэн байна. Ингээд нарлагаанд гарахгүй, хоол идэхгүй, өмгөөлөгчтэйгөө уулзахгүй гэж тус ангийн захиргаанд мэдэгдсэн байна. Өнөөдөр Цагдан хорих ангид байрладаг дэлгүүр ажилладаггүй юм байна. Ингээд ус байхгүй, энд тэндээс ус гуйгаад өл залгаад л байж байна.
Өнөөдрийг оролцуулаад тооцвол, 30 гаруй цаг өлсгөлөн зарлачихлаа. Хорих ангийн зүгээс өлсгөлөн зарласан тухай мэдээллээ хэргийг шалгаж байгаа прокурорт өгөөгүй байна. Гэхдээ даралтыг нь үзэж байгаа гэж надад хэлсэн.
-Та өөрийн биеэр уулзав уу. Биеийн байдал нь ямархуу байна?
-Шахаж, шаардаж байж уулзлаа. Одоогоор уруул нь омголдсон байна. Ус л ууж байгаа. Битүү байранд зөвхөн ус уугаад байхаар хүнд л дээ. Би түүнийг өлсгөлөн зарлахыг нь болиулж чадахгүй. Болсон явдал ийм байна, тийм байна гээд л... шилний наана цаанаас ярилцлаа.
-Өлсгөлөн зарласан тухай мэдээллийг прокурорт нь ямар хугацаанд өгөх ёстой байдаг юм бол?
-Хорих ангиас нэн даруй л мэдэгдэх ёстой. Яг одоогоор мэдээлэл авсан эсэхийг нь мэдэхгүй байна.
-Гэр бүлийнхэн нь ямар байдалтай байгаа вэ?
-Би өлсгөлөн зарласан гэж гэр бүлийнхэнд нь хэлээгүй байгаа. Одоо зурагт, сониноос хараад мэдэх байх. Надад хэлэх битгий хэл уулзахад хүртэл “халуун” байна. Яах эсэхээ мэдэхгүй болчихоод байна. Ямартай ч, 14 хоног цагдан хорих хугацааг сунгах эсэх шүүх хуралд биечлэн оролцоно. Энэ тухай хүсэлтээ маргааш өгнө.
-10 гаруй хоног цагдан хоригдлоо. Өнөөдрийг хүртэл хэрэг хариуцаж байгаа прокурорын байгууллагаас хэдэн удаа мэдүүлэг авсан бэ?
-Нэг удаа мэдүүлэг авсан. Ингэхдээ биеийн байдал нь ямар байна, та юу эрхэлж байсан гэдэг асуудлаар л мэдүүлэг авсан.
-Цагдаагийн байгууллагаас ар гэрийнхэнтэй нь уулзуулах зөвшөөрөл олгосон гэсэн?
-Хүүхэдтэй нь долоо хоногт ганцхан удаа уулзуулах бичиг өгсөн. Түүнээс байнга уулзуулж байгаа гэсэн мэдээлэл нь худлаа шүү. Уг нь хүүхэд долоо хоногт нэг удаа хөхөө хөхдөг амьтан биш шүү дээ.
Харин өлсгөлөн зарлах тухайгаа Г.Түвшинжаргал “...Та “Эхийн цагаан сүүний ард хор хулгай нуугдах ёсгүй” гэж хэлснийг өмгөөлөгчөөсөө сонсоод энэ захидлыг бичиж байна. Намайг цагаан сүүгээрээ хор хулгай нууж байгаа гэж та яаж мэдэж байгаа юм бэ, гэдгийг ойлгохгүй байна. Уг нь шүүхээс гэм буруутай гэж тогтоогоогүй, би ч гэмт хэрэг хийгээгүй атал миний зүтгэж явсан Ардчилсан Ерөнхийлөгч өөрөө олон нийтэд намайг “гэмт хэрэгтэн” мэтээр зарлаж байгаа нь надад хилсээр ял тулгах нь хэдийнээ тодорхой болчихсон юм байна гэж ойлгогдож байна.
Шоронгийн харанхуй өрөөнд нялх үрдээ сэтгэл зовинон тарчилж, чинэрсэн хөхөө суллах гэж аргаа барж суухдаа өөрийнхөө дэмжиж ирсэн ардчилсан гэгдэх энэ нийгэмд, хилс хэргийн золиос болж байгаадаа туйлын ихээр гомдож байна. Гэхдээ хөхнийхөө сүүг зангируулан нялх үрийнхээ шулганах дууг цаг хором бүрт чихэндээ сонсон, нүдэндээ харж, байж ядахдаа асгартал уйлмаар байгаа ч энэ худал хуурмаг бүхний төлөө унагах миний нулимс дэндүү хайран байна. Би одоо хэндээ итгэх вэ...
Ийм харгислалыг ийм газар өлсгөлөн зарлаж тэмцэхээс өөр арга надад харагдахгүй байна...” гэж өмгөөлөгчөөрөө дамжуулан олон нийтэд мэдэгдсэн билээ.