Т.ЦЭЛМЭГ

Ерөнхий сайд асан Н.Алтанхуягийн ахлах зөвлөхөөр ажиллаж байхдаа “Нүүрс” хөтөлбөрөөр их хэмжээний мөнгө завшсан хэргээр Л.Гансүх 3,6 жилийн хорих ял сонсоод буй. Түүнийг өнгөрсөн оны есдүгээр сарын 21-нд шүүж, 4,6 жил хорих ял оноож, төрийн албанд ажиллах эрхийг дөрвөн жилээр хасах шийдвэр гаргасан байдаг. Харин давж заалдах шатны шүүхээс давж заалдах гомдлуудыг хэрэгсэхгүй болгосон байдаг. Гэхдээ хагас сарын өмнө болсон Хяналтын шатны шүүх хурлаар зүйл ангийг нь өөрчилсөн юм. Хугацаа өнгөрөх тусам чухам ямар хэрэг болох нь ойлгомжгүй болж, өөчлөгдөж, бүдгэрсээр байгаа “нүүрс”-ний хэрэг гэж юу байв гэдгийг тодорхойлоход хэцүү болсоор. Анх “Нүүрс” хөтөлбөрийг хэрэгжүүлэхдээ улсад 3,6 тэрбум төгрөгийн хохирол учруулсан гэж үзэж байсан бол нүүрсний жингийн зөрүүнээс нэг тэрбум 730 сая төгрөгийн хохирол учирсан гэж үзэв. Энэ нь сүүлдээ нэг тэрбум 130 гаруй сая төгрөгийн зөрүү болсон. “Эм Жи Эл Эс Би” компанийн захирал Н.Даваахүү, нягтлан бодогч Б.Мөнгөнтуяа нарыг тус бүр 19 сая 200 мянган төгрөгөөр торгох шийдвэр гаргаж байсан.

Тэгвэл Н.Даваахүүд төрийн албанд ажиллах эрхийг хоёр жилээр хасч,15,3 сая төгрөгийн торгуулиас цагдан хоригдсон 44 хоногийг хөдөлмөрийн хөлсний доод хэмжээгээр тооцон хасч, 6 сая 912 мянган төгрөг болгосон. Харин Б.Мөнгөнтуяад оноосон ялыг хэрэгсэхгүй болгож, цагаатгасан билээ.

Энэ хэргийг анхнаасаа улс төрийн зорилготой байсан гэж мэдэгдэж УИХ-ын гишүүн Н.Алтанхуяг “Цэвэр улс төрийн зорилготой шүүж байна. Н.Алтанхуягийн Засгийн газрыг унагаах зорилгоор хийсэн ажлын нэг. Би ард түмний төлөө ажиллах гэж гарч ирсэн Ерөнхий сайд болохоос биш бүлэглэл юм уу, нам дамнасан хэдэн хүний төлөө үйлчилдэг хүн биш гэдгээ анхнаасаа хэлж байсан. Ингэснийхээ төлөө анхнаасаа шахалт, дарамт олон зүйлд өртсөн” хэмээн байр сууриа илэрхийлж байсан.

Хяналтын шатны шүүх хурлын дараа ч мөн үгээ хэлсэн. Тэрээр “Шинэчлэлийн Засгийн газар хоёр жил ард түмнээ хямд нүүрсээр хангасны төлөө Гансүхэд маань шоронд гурван жил зургаан сар суух ял өглөө. Намайг Ерөнхий сайдаас огцруулах гэж зохиосон улс төрийн захиалгат хэргээ үргэлжлүүлсээр байгаа нь ичсэн хүн хүн ална гэдэг л боллоо” хэмээн хэлж, өөрийн цахим хуудастаа байршуулсан юм.  

Харин өнгөрсөн долоо хоногт Л.Гансүх Ерөнхийлөгч Ц.Элбэгдоржид хандаж захидал бичсэн байна. Тэрээр захидалдаа ч мөн захиалгат улс төрийн хэрэг гэдгийг дурджээ. Түүний захидлыг хүргэе.

“Гэр хорооллын иргэддээ Нүүрсийг шигшиж, шуудайлж өгөх Шинэчлэлийн Засгийн газрын ажлыг зохион байгуулсан миний бие болон, байгуулсан гэрээний үүргээ ямар ч зөрчилгүй биелүүлсэн компаний захирал Даваахүү бид нарыг гэрээнд байхгүй үнийн зөрүүгээр 1,1 тэрбум төгрөгийн хохирол “Багануур” компанид төлөх, намайг 3,6 жил шоронд хорих, дөрвөн жил төрд ажиллах эрхийг хасахаар шүүх эцэслэн шийдвэрлэлээ.

Шинэчлэлийн Засгийн газрыг, Ерөнхий сайд Алтанхуягийг унагахын тулд улстөрчдийн захиалгаар энэ зохиомол хэргийг үүсгэн АТГ, прокурор, шүүхийн тодорхой бүлэг хүмүүсийг ашиглан энэ хэлмэгдүүлэлтийг хийлээ.

Хөтөлбөрийн хүрээнд Багануурын уурхай нэг ч төгрөгийн зардал гаргаагүй. Харин ч шигшсэн нүүрсийг цааш нь үнэ нэмж зарж  гурван тэрбум төгрөгийн ашиг олсон. Түүгээр ч зогсохгүй Засгийн газар 18,6 тэрбум төгрөгийн зээлийг хөнгөлөлттэй нөхцөлөөр олгож 400 сая тонны нөөцөө хувийн компанид алдсанаа Засгийн газраар шуурхай шийдвэрлүүлж авснаар эдийн засгийн хувьд ихээхэн чадавхижиж 2014 онд ажилчдаа таван сарын цалингаар урамшуулж байсныг энд дурдъя.
Б.Мөнгөнтуяаг зургаан сар шоронд хорьж, хоёр жил хэлмэгдүүлээд эцэст нь Дээд шүүхээс цагаатгалаа. Энэ улс төрийн захиалгат зохиомол хэргийн үнэн учрыг Монголын ард түмэн таван хоногийн шүүх хурлаас харж, биднийг үнэндээ цагаатгасан гэдэгт итгэдэг. Намайг дэмжиж ирсэн бүх хүмүүст талархлаа илэрхийлье.

Гансүх миний бие ард иргэдээ хямд нүүрсээр хангах ажлыг зохион байгуулсны төлөө зохиомол хэргээр хэлмэгдэж улс төрийн хэрэгтэн боллоо. Би цаашдаа ч ард түмнийхээ төлөө зүтгэнэ ээ. Тэгэхдээ хийгээгүй хэргийн төлөө уучлал хүсэхгүй, энэ “ял”-ыг эдэлж дуусгах болно гэдгээ албан ёсоор мэдэгдэж байна.
Иргэн Л.Гансүх 2016.03.30” гэжээ.

Л.Гансүх 2004-2008 онд УИХ-ын гишүүн, 2006-2008 онд УИХ дахь Ардчилсан намын зөвлөлийн даргаар ажиллаж байсан бол 2008-2012 онд УИХ-ын гишүүн, Байгаль орчин, аялал жуулчлалын сайдын албыг хашиж байсан. 2000-2003 онд “Залуу лидер” клубийн ерөнхийлөгч, 2003-2004 онд Ардчилсан намын Ерөнхий нарийн бичгийн даргаар ч ажиллаж явсан нэгэн. Ардчилсан намын засгийн эрх барьж байх хугацаанд ийнхүү ял авч, 3,6 жил хоригдохоор болоод байна.